హౌతీలపై సౌదీకి టర్కీ సైనిక సాయం?
“సైనిక అవసరాలు ఉంటే సహాయం అందిస్తాం”.. టర్కీ విదేశాంగ మంత్రి
యెమెన్లోని హౌతీల నుంచి సౌదీ అరేబియాపై దాడులు కొనసాగుతున్న నేపథ్యంలో టర్కీ కీలక ప్రకటన చేసింది. సౌదీకి సైనిక అవసరాలు ఏర్పడితే ముఖ్యంగా సాంకేతిక రంగాల్లో అవసరమైన సహాయం అందించేందుకు తమకు ఎలాంటి అభ్యంతరం లేదని టర్కీ విదేశాంగ మంత్రి హకాన్ ఫిదాన్ తెలిపారు.
శనివారం రాత్రి టర్కీ మీడియా సంస్థకు ఇచ్చిన ఇంటర్వ్యూలో ఫిదాన్ ఈ వ్యాఖ్యలు చేశారు. హౌతీ దాడుల నేపథ్యంలో గత నెల ఏర్పాటైన మెక్కా డిఫెన్స్ అలయన్స్ను సక్రియం చేసే పరిస్థితి వస్తుందా అనే ప్రశ్నకు ఆయన స్పందించారు. సౌదీకి కొన్ని సాంకేతిక సైనిక అవసరాలు ఉండవచ్చని, వాటిని తీర్చడంలో టర్కీకి ఇబ్బంది లేదని తెలిపారు.
ఈ రక్షణ కూటమిలో సౌదీ అరేబియాతో పాటు టర్కీ – పాకిస్థాన్ సభ్యులుగా ఉన్నాయి. సౌదీకి సైనిక మద్దతు అందించేందుకు పాకిస్థాన్ కూడా సిద్ధంగా ఉన్నట్లు ఇప్పటికే ప్రకటించింది. అయితే ప్రస్తుత పరిణామాల్లో ఈ దేశాలు సౌదీకి మద్దతు ప్రకటిస్తున్నప్పటికీ, విస్తృత స్థాయి సైనిక జోక్యంపై స్పష్టమైన నిర్ణయం వెలువడలేదు.
శనివారం సౌదీ అరేబియా రాజధాని రియాద్పైకి వచ్చిన బాలిస్టిక్ క్షిపణిని తమ రక్షణ వ్యవస్థ అడ్డుకున్నట్లు ప్రకటించింది. పౌర ప్రాంతాలను లక్ష్యంగా చేసుకున్న మరికొన్ని హౌతీ దాడులను కూడా అడ్డుకున్నట్లు సౌదీ అధికారులు తెలిపారు.
సౌదీపై జరుగుతున్న దాడులను టర్కీ తీవ్రంగా పరిగణిస్తోందని హకాన్ ఫిదాన్ పేర్కొన్నారు. సౌదీ అరేబియా ప్రాదేశిక సమగ్రత – సార్వభౌమత్వంపై తీవ్రమైన దాడులు జరుగుతున్నాయని ఆయన అన్నారు. మూడు రోజుల క్రితం ఇస్లాం పవిత్ర నగరమైన మెక్కాపై డ్రోన్ దాడి జరిగినట్లు వచ్చిన నివేదికల నేపథ్యంలో కూడా టర్కీ హౌతీలను ఖండించింది.
“మా కూటమి కింద ఇచ్చిన మాటకు కట్టుబడి ఉంటాం” అని ఫిదాన్ స్పష్టం చేశారు. దీంతో సౌదీపై హౌతీ దాడులు కొనసాగుతున్న నేపథ్యంలో మెక్కా డిఫెన్స్ అలయన్స్ భవిష్యత్ పాత్రపై ఆసక్తి నెలకొంది.
మరోవైపు సౌదీ అరేబియా ప్రస్తుతం ఇరాన్ యుద్ధం ప్రభావంతో ఏర్పడుతున్న ప్రాంతీయ ఉద్రిక్తతల్లో మరింతగా చిక్కుకుంటోందని అంతర్జాతీయ విశ్లేషణలు పేర్కొంటున్నాయి. హౌతీలు సౌదీ పశ్చిమ ప్రాంతాలు – ఇంధన మౌలిక వసతులను లక్ష్యంగా చేసుకుంటున్న నేపథ్యంలో టర్కీ – పాకిస్థాన్ మద్దతు ప్రాంతీయ భద్రతా పరిణామాల్లో కీలకంగా మారే అవకాశం ఉంది.
