అమెరికా మాజీ NSA – రష్యా నుంచి యురేనియం కొంటున్నాం.. ఇది పిచ్చితనమే!
రష్యా నుంచి చమురు-గ్యాస్ కొనుగోలు చేస్తున్న దేశాలపై కఠిన చర్యలు తీసుకోవాలన్న అమెరికా ప్రయత్నాలకు మాజీ జాతీయ భద్రతా సలహాదారు లెఫ్టినెంట్ జనరల్ హెచ్.ఆర్. మెక్మాస్టర్ మద్దతు తెలిపారు. అయితే భారత్ విషయంలో అమెరికా మరింత అవగాహనతో వ్యవహరించాల్సిన అవసరం ఉందని ఆయన పేర్కొన్నారు. ఏఎన్ఐకి ఇచ్చిన ఇంటర్వ్యూలో మెక్మాస్టర్ ఈ వ్యాఖ్యలు చేశారు.
రష్యా చమురు-గ్యాస్ కొనుగోళ్లను కొనసాగించే దేశాలపై 100 శాతం వరకు సుంకాలు విధించే అధికారం అమెరికా అధ్యక్షుడికి కల్పించే ‘లిండ్సే ఓ. గ్రాహమ్ శాంక్షనింగ్ రష్యా అండ్ ఇరాన్ యాక్ట్-2026’కు అమెరికా ప్రతినిధుల సభ సెప్టెంబర్ 16న ఆమోదం తెలిపింది. ఈ బిల్లులో రష్యా ఇంధనాన్ని పెద్ద మొత్తంలో కొనుగోలు చేసే దేశాలపై అదనపు సుంకాలకు అవకాశం ఉంది.
ఈ చర్యను మెక్మాస్టర్ సమర్థించారు. రష్యాపై ఆర్థిక ఒత్తిడి పెంచడం ద్వారా యుద్ధాలను కొనసాగించడం ఖర్చుతో కూడుకున్నదిగా మార్చాల్సిన అవసరం ఉందని ఆయన అభిప్రాయపడ్డారు. అయితే అదే సమయంలో అమెరికా రష్యా నుంచి యురేనియం కొనుగోలు చేయడాన్ని ప్రస్తావిస్తూ, శత్రుత్వం ఉన్న దేశానికి తన ఆర్థిక వ్యవస్థపై ప్రభావం చూపే అవకాశం కల్పించడం సరికాదని వ్యాఖ్యానించారు.
భారత్ రష్యా నుంచి చమురు కొనుగోలు చేస్తున్న అంశంపై మెక్మాస్టర్ భిన్నమైన దృక్పథాన్ని వ్యక్తం చేశారు. భారత్ భద్రతాపరమైన పరిస్థితిని అమెరికా పరిగణనలోకి తీసుకోవాలని, ఇలాంటి సంక్లిష్ట అంశాలను భారత దృష్టికోణం నుంచి కూడా అర్థం చేసుకోవాల్సి ఉందని అన్నారు. భారత్కు చైనా-పాకిస్థాన్ వంటి భద్రతాపరమైన సవాళ్లు ఉన్నాయని ఆయన పేర్కొన్నారు.
రష్యా నుంచి భారత్ భారీగా ముడిచమురు దిగుమతి చేసుకుంటోంది. జూలైలో దేశ మొత్తం ముడిచమురు దిగుమతుల్లో రష్యా వాటా సుమారు 51 శాతానికి చేరినట్లు తాజా మార్కెట్ డేటాను ఉటంకిస్తూ నివేదికలు పేర్కొన్నాయి. సరఫరా భద్రత, ధరలు, అంతర్జాతీయ మార్కెట్ పరిస్థితుల నేపథ్యంలో భారత్ దిగుమతుల మూలాలను వైవిధ్యపరుస్తూనే ఇంధన భద్రతకు ప్రాధాన్యం ఇస్తోంది.
అమెరికా కాంగ్రెస్ ఆమోదించిన తాజా చట్టంపై భారత్ ఇప్పటికే స్పందించింది. రష్యా చమురు కొనుగోళ్లపై ప్రతిపాదిత సుంకాలు భారత్-అమెరికా సంబంధాలు, అంతర్జాతీయ ఇంధన మార్కెట్లపై ప్రభావం చూపే అవకాశం ఉందని న్యూఢిల్లీ ఆందోళన వ్యక్తం చేసింది. 140 కోట్ల మంది ప్రజల ఇంధన భద్రతను కాపాడటం తమ ప్రాధాన్యమని భారత ప్రభుత్వం స్పష్టం చేసింది.
ఈ నేపథ్యంలో మెక్మాస్టర్ వ్యాఖ్యలు ప్రాధాన్యం సంతరించుకున్నాయి. ఒకవైపు రష్యా ఇంధన కొనుగోళ్లపై ఆంక్షలు-సుంకాలను ఆయన సమర్థించగా, మరోవైపు భారత్ పరిస్థితిని అర్థం చేసుకోవాలని అమెరికాకు సూచించారు. ఇదే సమయంలో రష్యా నుంచి అమెరికా యురేనియం కొనుగోళ్ల అంశాన్ని కూడా ఆయన ప్రస్తావించడం చర్చకు దారితీసింది.
