హరిబాబు హత్యలో ఊహించని ట్విస్ట్‌!

తానే హత్య చేశానని వైష్ణవి సోదరుడు సంతోష్‌ అంగీకారం…‘‘నా చెల్లిని చంపినవాడిని నేనే చంపేశా’’.. పోలీసుల ఎదుట లొంగుబాటు

తనకు భార్య – పిల్లలు ఉన్నారని సంతోష్‌ వీడియోలో పేర్కొన్నాడు. తన చెల్లిని
హత్య చేసినందుకే హరిబాబును తాను చంపినట్లు తెలిపాడు. హరిబాబును చంపిన
అనంతరం తనకు భయంగా ఉందని, తాను బయటకు రావడానికి సహకరించాలని కోరాడు.
తనకు శిక్ష పడకుండా త్వరగా బయటకు వచ్చేందుకు సహాయం చేయాలని విజ్ఞప్తి చేశాడు.
తానే పోలీస్‌ స్టేషన్‌లో లొంగిపోతున్నట్లు వీడియోలో వెల్లడించాడు.

వీడియో విడుదల చేసిన అనంతరం సంతోష్‌ కోరుట్ల పోలీసుల ఎదుట లొంగిపోయాడు.
హరిబాబు హత్యకు సంబంధించి అతడిని పోలీసులు అదుపులోకి తీసుకుని విచారిస్తున్నారు.
విచారణ నిమిత్తం నిందితుడు సంతోష్‌ను కోరుట్ల పోలీసులు నిజామాబాద్‌ పోలీసులకు
అప్పగించనున్నట్లు సమాచారం.

జగిత్యాల జిల్లా కోరుట్ల మండలం మాదాపూర్‌కు చెందిన వైష్ణవి (24) – చిథారి
హరిబాబు ప్రేమ వివాహం చేసుకున్నారు. వైష్ణవి ‘వైషు అమ్మ’ పేరుతో యూట్యూబ్‌
ఛానల్‌ నిర్వహిస్తూ సోషల్‌ మీడియాలో గుర్తింపు తెచ్చుకున్నారు. నాలుగు నెలల
గర్భవతిగా ఉన్న సమయంలో ఈ ఏడాది మార్చి 17న తన నివాసంలో రక్తపు మడుగులో
విగతజీవిగా కనిపించారు. ఆమెను భర్త హరిబాబు కత్తితో దారుణంగా పొడిచి హత్య
చేసి పరారైనట్లు అప్పట్లో పోలీసులు వెల్లడించారు.

అదనపు కట్నం కోసం హరిబాబు – అతని కుటుంబ సభ్యులు తల్లి లక్ష్మి, అన్నలు
ఆనంద్ – అశోక్‌ వైష్ణవిని శారీరకంగా – మానసికంగా వేధించారని పోలీసుల
విచారణలో తేలినట్లు సమాచారం. ఇదే విషయమై మార్చి 16 రాత్రి వైష్ణవి –
హరిబాబు మధ్య తీవ్ర వాగ్వాదం జరిగినట్లు పోలీసులు వెల్లడించారు. ఆ తర్వాతే
ఈ దారుణం చోటుచేసుకున్నట్లు తెలిపారు.

వైష్ణవి హత్యపై కేసు నమోదు చేసిన పోలీసులు పరారీలో ఉన్న ప్రధాన నిందితుడు
హరిబాబును అదే రోజు కోరుట్ల శివారులో అదుపులోకి తీసుకుని అరెస్ట్‌ చేశారు.
వేధింపులకు సంబంధించి అతని కుటుంబ సభ్యులపై కూడా కేసులు నమోదు చేసి
దర్యాప్తు చేపట్టారు.

వైష్ణవి హత్య కేసులో నిందితుడిగా ఉన్న హరిబాబు బెయిల్‌పై బయటకు వచ్చిన
అనంతరం నిందితుడు గుర్తుతెలియని వ్యక్తి దాడిలో హత్యకు గురయ్యాడు.
నిందితుడు కారులో వచ్చి హరిబాబును కత్తులతో పొడిచి పరారైనట్లు పోలీసులు
గుర్తించారు. ఈ ఘటనపై సీసీటీవీ ఆధారంగా దర్యాప్తు కొనసాగుతుండగా,
తాజాగా వైష్ణవి సోదరుడు సంతోష్‌ తానే హరిబాబును హత్య చేసినట్లు
వెల్లడించడం కేసులో కీలక పరిణామంగా మారింది.

వీడియోలో చేసిన వ్యాఖ్యలు – పోలీసుల ఎదుట లొంగుబాటు నేపథ్యంలో హరిబాబు
హత్య కేసులో సంతోష్‌ పాత్రపై పోలీసులు పూర్తి స్థాయిలో విచారణ చేపట్టనున్నారు.
వైష్ణవి హత్య కేసు నుంచి ప్రారంభమైన ఈ వ్యవహారం ఇప్పుడు హరిబాబు హత్యతో
మరో కీలక మలుపు తిరిగింది. దర్యాప్తు పూర్తయిన తర్వాత హత్యకు సంబంధించిన
పూర్తి వివరాలు వెల్లడయ్యే అవకాశం ఉంది.