325 సర్వే నంబర్‌లో 388 ఎకరాల భూములపై అధికారుల దృష్టి

మర్కూక్‌ మండలం ఎర్రవల్లిలోని మాజీ సీఎం కేసీఆర్‌ ఫామ్‌హౌస్‌ పరిసరాల్లో భూముల సర్వే కొనసాగుతోంది. 325 సర్వే నంబర్‌లోని 388 ఎకరాల భూములపై అధికారులు ప్రధానంగా దృష్టి సారించారు. ఆదివారం సెలవు కావడంతో సర్వే ప్రక్రియకు విరామం ఇచ్చారు. సోమవారం నుంచి రైతుల వారీగా భూముల వివరాలను పరిశీలించనున్నట్లు అధికారులు తెలిపారు. 0

325 సర్వే నంబర్‌లో భూములు ఉన్న రైతులకు ఇప్పటికే అధికారులు నోటీసులు జారీ చేశారు. సుమారు 120 మందికి నోటీసులు అందినట్లు తాజా సమాచారం. భూములకు సంబంధించిన పట్టాలు, ఇతర ఆధారాలతో సెప్టెంబర్‌ 21న అధికారుల ఎదుట హాజరు కావాలని సూచించారు. సర్వే నంబర్‌లోని ఇతర రైతులకు కూడా విడతల వారీగా నోటీసులు జారీ చేసే అవకాశం ఉంది. 1

గత మూడు రోజులుగా అధికారులు 325 సర్వే నంబర్‌ పరిధిని పరిశీలించి భూముల హద్దులను గుర్తిస్తున్నారు. ఇప్పటికే బౌండరీలను మార్కింగ్‌ చేసినట్లు అధికారులు తెలిపారు. తదుపరి దశలో ఎంజాయ్‌మెంట్‌ సర్వే చేపట్టి.. ఏ రైతు ఏ భూమిని సాగు చేస్తున్నారనే వివరాలను నమోదు చేయనున్నారు. అనంతరం రైతుల వారీగా భూములను గుర్తించి సబ్‌ డివిజన్‌ చేసే ప్రక్రియ చేపట్టనున్నట్లు సమాచారం.

సర్వే అండ్‌ ల్యాండ్‌ రికార్డ్స్‌ అసిస్టెంట్‌ డైరెక్టర్‌ సుదర్శన్‌ రాథోడ్‌ ఆధ్వర్యంలో సర్వే కొనసాగుతోంది. గజ్వేల్‌, హుస్నాబాద్‌, కలెక్టరేట్‌ డివిజన్లకు చెందిన సర్వే అధికారులు, మర్కూక్‌ ఆర్‌ఐ, మండల సర్వేయర్‌తో పాటు ఇతర సిబ్బంది బృందాలుగా పనిచేస్తున్నారు. 325 సర్వే నంబర్‌లోని 388 ఎకరాల భూములకు సంబంధించి రెవెన్యూ రికార్డులను కూడా అధికారులు పరిశీలిస్తున్నారు. 2

రైతుల వారీగా వివరాలు సేకరించిన తర్వాత మొత్తం 388 ఎకరాల్లో ఎంత భూమి సాగులో ఉంది? ఎంత భూమి ఇతర వినియోగంలో ఉంది? ప్రభుత్వ భూమిలో మరేదైనా ఆక్రమణ ఉందా? అనే అంశాలపై స్పష్టత వచ్చే అవకాశం ఉంది. సేకరించిన వివరాలను ఉన్నతాధికారులకు నివేదించనున్నట్లు సమాచారం.

ఇదిలా ఉండగా.. సర్వే నేపథ్యంలో పలువురు దళిత రైతులు తమ భూముల వద్దకు చేరుకుని ఆందోళన వ్యక్తం చేశారు. దశాబ్దాలుగా తాము సాగు చేసుకుంటున్న భూముల విషయంలో తమకు న్యాయం చేయాలని కోరారు. తమ భూములను ఇతరులకు కేటాయించకుండా రక్షించాలని, పెండింగ్‌లో ఉన్న పట్టాల పంపిణీని పూర్తి చేయాలని డిమాండ్‌ చేశారు. 3

325 సర్వే నంబర్‌లోని భూములు సుమారు 60 ఏళ్ల క్రితం పేద దళిత రైతులకు అసైన్‌ చేసినవిగా అధికారులు – రైతుల వాదనలు ఉన్నాయి. సర్వే ప్రక్రియ కొనసాగుతున్న నేపథ్యంలో భూముల హద్దులు, రికార్డులు, రైతుల సాగు అనుభవం తదితర అంశాలపై అధికారుల పరిశీలన పూర్తయ్యే వరకు ఈ వ్యవహారంపై మరింత స్పష్టత వచ్చే అవకాశం ఉంది. 4