ఏఐ కాల్ చేస్తుందనుకుంటే.. మనిషే మాట్లాడుతున్నాడు!
న్యూయార్క్, సెప్టెంబర్ 22 (నవజ్యోతి ప్రతినిధి):
ఏఐ స్వయంగా ఫోన్ చేసి పనులు పూర్తి చేస్తుందంటూ తీసుకొచ్చిన తన కొత్త వ్యక్తిగత ఏఐ అసిస్టెంట్ ‘మ్యూజ్’లో మెటా ఓ ప్రయోగం చేసింది. ఏఐ చేయాల్సిన కొన్ని ఫోన్ కాల్స్ను మానవ కాంట్రాక్టర్లతో చేయించినట్లు రాయిటర్స్ వెల్లడించింది. సంస్థ అంతర్గత పోస్టుల ఆధారంగా ఈ విషయాన్ని రాయిటర్స్ తెలిపింది.
మెటా ఇటీవల మ్యూజ్లో ఫోన్ కాలింగ్ సదుపాయాన్ని అందుబాటులోకి తీసుకొచ్చింది. వినియోగదారులు అమెరికాలోని వ్యాపార సంస్థలకు మ్యూజ్ ద్వారా ఫోన్ చేయించి హెయిర్కట్ బుకింగ్, స్టాక్లో వస్తువు ఉందో లేదో తెలుసుకోవడం, వివిధ కాంట్రాక్టర్ల నుంచి ధరలు తెలుసుకోవడం వంటి పనులు చేయించుకోవచ్చు. అయితే కొన్ని సందర్భాల్లో ఏఐతో మాట్లాడేందుకు అవతలి వ్యక్తులు నిరాకరించడంతో ఈ ఫీచర్ సవాళ్లను ఎదుర్కొన్నట్లు తెలుస్తోంది.
ఈ సమస్యను అధిగమించేందుకు మెటా ఉద్యోగుల్లో కొంతమందికి ‘హ్యూమన్ కన్సీర్జ్’ లేదా ‘హ్యూమన్ ఏజెంట్ కాల్స్’ అనే విధానాన్ని పరీక్షించినట్లు అంతర్గత పోస్టుల్లో పేర్కొన్నారని రాయిటర్స్ తెలిపింది. ఇందులో మ్యూజ్ వినియోగదారుడి అభ్యర్థనను శిక్షణ పొందిన మానవ ఏజెంట్కు అప్పగిస్తే.. ఆ వ్యక్తి వినియోగదారుడి తరఫున ఫోన్ చేసి పని పూర్తి చేస్తారు.
అయితే ఈ విధానంపై మెటా ఉద్యోగుల్లో గోప్యతకు సంబంధించిన ఆందోళనలు వ్యక్తమయ్యాయి. ఫోన్ కాల్స్లో వ్యక్తిగత లేదా సున్నితమైన సమాచారం కాంట్రాక్టర్లకు తెలియకుండా వెళ్లే ప్రమాదం ఉందని కొందరు ఉద్యోగులు అంతర్గత పోస్టుల్లో అభిప్రాయపడ్డారు. ఒక ఉద్యోగి తన ఇంటర్నెట్, కేబుల్ బిల్లుపై చర్చించేందుకు మ్యూజ్ను ఉపయోగించగా, కాల్ ట్రాన్స్క్రిప్ట్లో మానవ కాంట్రాక్టర్ జాతికి సంబంధించిన అభ్యంతరకర వ్యాఖ్య చేసినట్లు పేర్కొన్నాడు.
దీనిపై మెటా సూపర్ఇంటెలిజెన్స్ ల్యాబ్స్కు చెందిన ఓ వైస్ ప్రెసిడెంట్ స్పందిస్తూ, సరైన సమాచారం ఇవ్వకుండా కాంట్రాక్టర్లతో కాల్స్ చేయించడం తమ తప్పిదమని అంగీకరించారు. ప్రస్తుతానికి ఈ ఫీచర్ను వెనక్కి తీసుకున్నామని తెలిపారు. అయితే ఏఐ కాలింగ్ను మరింత మెరుగుపరిచే పరీక్షలు కొనసాగుతున్నాయని, కొన్ని పరీక్షల్లో మానవ ఏజెంట్లతో కాల్స్ చేయించినప్పుడు విజయవంతమైన ఫలితాలు 95 నుంచి 98 శాతం వరకు ఉన్నాయని పేర్కొన్నారు.
మానవ శ్రమను తెరవెనుక ఉపయోగించడం ద్వారా ఏఐ ఆధారిత సేవలను మెరుగుపరచే విధానంపై ఈ ప్రయోగం మరోసారి చర్చకు దారితీసింది. గతంలో ఫేస్బుక్ పేరుతో ఉన్న సమయంలో మెటా ‘ఎం’ అనే డిజిటల్ అసిస్టెంట్ను పరీక్షించింది. ఆ ప్రయోగంలోనూ ఏఐ చేయాల్సిన పనుల్లో గణనీయమైన భాగాన్ని మనుషులు నిర్వహించినట్లు అప్పటి మీడియా కథనాలు పేర్కొన్నాయి.
మ్యూజ్ హ్యూమన్ కన్సీర్జ్ ప్రయోగంపై ఉద్యోగుల స్పందన సానుకూలంగానే ఉందని మెటా అధికార ప్రతినిధి డేనియల్ రాబర్ట్స్ తెలిపారు. భద్రత, గోప్యతకు సంబంధించిన రక్షణ చర్యలను మెరుగుపరచడానికి ఈ పరీక్ష ఉద్దేశించిందని, తగిన సమాచార వెల్లడితో ఫీచర్ను సిద్ధం చేసిన తర్వాతే వినియోగదారులకు అందుబాటులోకి తీసుకొస్తామని చెప్పారు.
మార్కెట్ ఇంటెలిజెన్స్ సంస్థ సెన్సర్ టవర్ సమాచారం ప్రకారం మ్యూజ్ విడుదలైనప్పటి నుంచి 25 లక్షలకు పైగా డౌన్లోడ్లు నమోదయ్యాయి. ఏఐ ఏజెంట్ వినియోగదారుల తరఫున ఇమెయిళ్లు పంపడం, షాపింగ్ చేయడం, ప్రయాణాలను బుక్ చేయడం వంటి పనులను స్వయంగా నిర్వహించగలదని మెటా చెబుతోంది.
మ్యూజ్ ప్రారంభ సమయంలో ప్రతి ఏజెంట్కు ప్రత్యేకమైన సురక్షిత ‘వర్చువల్ మెషీన్’ ఉంటుందని, వినియోగదారుల సెషన్లు వేరుగా ఉంటాయని మెటా వివరించింది. పాస్వర్డ్ల వంటి సున్నితమైన సమాచారాన్ని ప్రత్యేక భద్రతా నిల్వలో ఉంచుతామని కూడా పేర్కొంది. అయితే మానవ కాంట్రాక్టర్లతో ఫోన్ కాల్స్ చేయించే ప్రయోగం ఈ గోప్యతా భద్రతలపై ఉద్యోగుల్లో కొత్త ప్రశ్నలను లేవనెత్తింది.
