జిల్లా కాంగ్రెస్ బలోపేతానికి సమన్వయమే కీలకం

సంగారెడ్డి, సెప్టెంబర్ 21 (నవజ్యోతి ప్రతినిధి):

సంగారెడ్డి జిల్లా కాంగ్రెస్ కమిటీ నూతన అధ్యక్షుడిగా నియమితులైన పట్లోళ్ల చంద్రశేఖర్ రెడ్డి, నారాయణఖేడ్ ఎమ్మెల్యే సంజీవరెడ్డితో కలిసి టీపీసీసీ వర్కింగ్ ప్రెసిడెంట్ జగ్గారెడ్డిని సంగారెడ్డి రామ్‌నగర్ రామ్ మందిర్‌లో మర్యాదపూర్వకంగా కలిశారు. చంద్రశేఖర్ రెడ్డిని జగ్గారెడ్డి శాలువాతో సత్కరించి అభినందనలు తెలిపారు. ఏఐసీసీ ఇటీవల చంద్రశేఖర్ రెడ్డిని సంగారెడ్డి డీసీసీ అధ్యక్షుడిగా నియమించింది.

ఈ సందర్భంగా జగ్గారెడ్డి మాట్లాడుతూ నిర్మలా జగ్గారెడ్డి ఏడేళ్లకు పైగా డీసీసీ అధ్యక్షురాలిగా పార్టీ కార్యక్రమాలను సమన్వయం చేశారని తెలిపారు. నూతన అధ్యక్షుడు చంద్రశేఖర్ రెడ్డి నాయకత్వంలో జిల్లా వ్యాప్తంగా పార్టీ కార్యక్రమాలను మరింత విస్తృతంగా చేపట్టేందుకు తన పూర్తి సహకారం ఉంటుందన్నారు. పార్టీ అధిష్టానం సూచనలకు అనుగుణంగా నాయకులు, కార్యకర్తలను సమన్వయం చేసుకుంటూ ముందుకు సాగాలని సూచించారు.

చంద్రశేఖర్ రెడ్డి మాట్లాడుతూ తనపై నమ్మకంతో బాధ్యతలు అప్పగించిన పార్టీ అధిష్టానానికి కృతజ్ఞతలు తెలిపారు. జిల్లాలోని సీనియర్ నాయకులు, కార్యకర్తలను కలుపుకొని పార్టీ సంస్థాగత బలోపేతానికి కృషి చేస్తానన్నారు.

ఎమ్మెల్యే సంజీవరెడ్డి మాట్లాడుతూ చంద్రశేఖర్ రెడ్డికి కీలక బాధ్యత అప్పగించిన ఏఐసీసీ నాయకత్వానికి కృతజ్ఞతలు తెలిపారు. జిల్లా కాంగ్రెస్‌లో అందరి సహకారంతో పార్టీ కార్యక్రమాలను ముందుకు తీసుకెళ్తామని పేర్కొన్నారు. నూతన అధ్యక్షుడి నియామకంతో సంగారెడ్డి డీసీసీకి పెండింగ్‌లో ఉన్న నాయకత్వ ప్రక్రియ ముగిసింది.