స్కూల్లో చదువులా.. నిర్మాణమా? ఒకవైపు తరగతులు.. మరోవైపు అదనపు అంతస్తుల నిర్మాణం!
కుత్బుల్లాపూర్, సెప్టెంబర్ 29 (నవజ్యోతి ప్రతినిధి): పిల్లలు క్లాసుల్లో.. పై అంతస్తుల్లో నిర్మాణ పనులు! ఓ వైపు విద్యార్థులకు పాఠాలు బోధిస్తుండగా.. మరోవైపు అదే భవనంపై అదనపు అంతస్తుల నిర్మాణం కొనసాగుతున్నట్లు ఆరోపణలు వినిపిస్తున్నాయి. ఇటుకలు, సిమెంటు, ఇసుక వంటి నిర్మాణ సామగ్రిని పైకి తరలించడం.. విద్యార్థుల రాకపోకలు ఒకేసారి కొనసాగుతున్న పరిస్థితిపై పలు ప్రశ్నలు తలెత్తుతున్నాయి.
సూరారం శ్రీకృష్ణనగర్ కాలనీలోని శ్రీ విజ్ఞాన్ విద్యానికేతన్ హైస్కూల్ వద్ద కనిపిస్తున్న పరిస్థితులపై స్థానికులు ఆందోళన వ్యక్తం చేస్తున్నారు. ఒకవైపు విద్యార్థులకు తరగతులు నిర్వహిస్తూనే.. మరోవైపు భవనానికి అదనపు అంతస్తుల నిర్మాణ పనులు కొనసాగుతున్నట్లు వారు చెబుతున్నారు. దీంతో పాఠశాల ప్రాంగణం విద్యాబోధనకు మాత్రమేనా.. నిర్మాణ కార్యకలాపాలకు కూడా వేదికగా మారిందా? అన్న చర్చ మొదలైంది.
నిర్మాణ పనులకు, తరగతి గదులకు మధ్య భద్రతా విభజన ఉందా? విద్యార్థులు నిర్మాణ ప్రాంతానికి దూరంగా ఉండేలా ఏర్పాట్లు చేశారా? నిర్మాణ సమయంలో పాఠశాల కార్యకలాపాలు కొనసాగించేందుకు అవసరమైన భద్రతా ప్రమాణాలు పాటిస్తున్నారా? అనే అంశాలపై సంబంధిత అధికారులు క్షేత్రస్థాయిలో పరిశీలన చేయాల్సిన అవసరం ఉంది.
అసలు ఎన్ని అంతస్తులకు అనుమతి? భవనం నిర్మాణానికి మొదట ఎన్ని అంతస్తులకు అనుమతులు ఇచ్చారు? ప్రస్తుతం ఎన్ని అంతస్తులు ఉన్నాయి? ఇప్పుడు అదనంగా ఎన్ని అంతస్తులు నిర్మిస్తున్నారు? ఈ అదనపు నిర్మాణానికి మున్సిపల్ అనుమతి ఉందా? మంజూరైన భవన ప్రణాళికకు అనుగుణంగానే నిర్మాణం జరుగుతోందా? అన్న ప్రశ్నలు స్థానికుల్లో వ్యక్తమవుతున్నాయి.
అనుమతులు ఒక విధంగా.. నిర్మాణం మరో విధంగా ఉంటే పరిస్థితి ఏమిటన్నదీ ప్రశ్నార్థకంగా మారింది. ముఖ్యంగా హైటెన్షన్ విద్యుత్ లైన్ల సమీపంలో నిర్మాణానికి సంబంధించి నిబంధనలు ఏ మేరకు వర్తిస్తాయో అధికారులు స్పష్టం చేయాల్సిన అవసరం ఉంది.
స్కూల్ భద్రతపై విద్యాశాఖకు పట్టింపేదీ? ప్రైవేట్ పాఠశాలల్లో విద్యార్థుల భద్రత, భవన స్థిరత్వం, అగ్నిమాపక ఏర్పాట్లు, నిర్మాణ మార్పులు వంటి అంశాలను సంబంధిత అధికారులు ఎప్పటికప్పుడు పరిశీలించాల్సిన అవసరం ఉంది. అయితే నిర్మాణ పనులు కొనసాగుతున్న పాఠశాలలను అధికారులు క్షేత్రస్థాయిలో పరిశీలిస్తున్నారా? పాఠశాల నిర్వహణకు అవసరమైన నిబంధనలు పాటిస్తున్నారా? అన్నది ఇప్పుడు చర్చనీయాంశంగా మారింది.
విద్యార్థి సంఘాల నాయకులు కూడా ఇదే అంశాన్ని ప్రస్తావిస్తున్నారు. “ప్రమాదం జరిగిన తర్వాత తనిఖీలు చేయడం కంటే.. ప్రమాదానికి ముందే తనిఖీలు నిర్వహిస్తేనే ప్రయోజనం” అని వారు కోరుతున్నారు.
శ్రీ విజ్ఞాన్ విద్యానికేతన్ భవనానికి మంజూరైన అనుమతులు ఏమిటి? ప్రస్తుతం జరుగుతున్న నిర్మాణం ఏ మేరకు నిబంధనలకు అనుగుణంగా ఉంది? హైటెన్షన్ లైన్ల సమీపంలో నిర్మాణానికి భద్రతా ప్రమాణాలు పాటిస్తున్నారా? పాఠశాల కార్యకలాపాలు కొనసాగుతున్న సమయంలో నిర్మాణ పనులకు సంబంధించి ప్రత్యేక భద్రతా ఏర్పాట్లు చేశారా? అనే అంశాలపై మున్సిపల్, విద్యాశాఖ, సంబంధిత విద్యుత్ అధికారులు క్షేత్రస్థాయిలో పరిశీలించి స్పష్టత ఇవ్వాల్సిన అవసరం ఉంది.
