న్యూఢిల్లీ, సెప్టెంబర్ 28 (నవజ్యోతి ప్రతినిధి):
ఉగ్రవాదంపై సమగ్ర వ్యూహాన్ని మరింత బలోపేతం చేయాలని కేంద్ర హోంమంత్రి అమిత్ షా సూచించారు. న్యూఢిల్లీలో సోమవారం నిర్వహించిన ‘ప్రహార్-సీటీ పాలసీ అండ్ స్ట్రాటజీ’ సదస్సును ఆయన ప్రారంభించారు. ఉగ్రవాదానికి సంబంధించిన ప్రతి అంశంపై ముందస్తు చర్యలు, సమన్వయం, వేగవంతమైన ప్రతిస్పందనకు ప్రాధాన్యం ఇవ్వాలని అధికారులను కోరారు.
‘ప్రహార్’ వ్యూహంలోని నివారణ, ప్రతిస్పందన, అంతర్గత సామర్థ్యాల సమీకరణ, మానవ హక్కులు, ఉగ్రవాదానికి దారితీసే పరిస్థితుల నియంత్రణ, అంతర్జాతీయ ప్రయత్నాల సమన్వయం, పునరుద్ధరణ-స్థైర్యం అనే ఏడు అంశాలపై సదస్సులో చర్చించారు. దేశవ్యాప్తంగా సమాజంలోని అన్ని వర్గాల భాగస్వామ్యంతో ఉగ్రవాదాన్ని ఎదుర్కోవాల్సిన అవసరాన్ని వివరించారు.
పోలీస్ స్టేషన్ స్థాయి వరకు ‘ప్రహార్’
ఉగ్రవాద వ్యతిరేక చర్యలు క్షేత్రస్థాయిలోనూ సమర్థంగా అమలయ్యేలా వ్యవస్థను బలోపేతం చేయాలని అమిత్ షా సూచించారు.
ప్రధాని నరేంద్ర మోదీ నాయకత్వంలో అన్ని రకాల ఉగ్రవాదంపై కేంద్ర ప్రభుత్వం ‘జీరో టాలరెన్స్’ విధానాన్ని అనుసరిస్తోందని అమిత్ షా తెలిపారు. గత ఉగ్రవాద ఘటనలను నిరంతరం విశ్లేషిస్తూ, వచ్చే పదేళ్లకు పటిష్టమైన ‘ప్రహార్’ వ్యవస్థను రూపొందించాల్సిన అవసరం ఉందన్నారు. ఈ వ్యూహంలోని అంశాలు పోలీస్ స్టేషన్ స్థాయి వరకు చేరేలా చర్యలు తీసుకోవాలని సూచించారు.
ప్రతి స్థాయిలో ఉగ్రవాద వ్యతిరేక చర్యలకు ఆటోమేటెడ్ రెస్పాన్స్ వ్యవస్థను ఏర్పాటు చేయాలని హోంమంత్రి సూచించారు. చర్యల్లో ఆలస్యం జరగకుండా కేంద్ర, రాష్ట్ర సంస్థల మధ్య మెరుగైన సమన్వయం అవసరమని చెప్పారు. ‘ప్రహార్’లోని ప్రతి అంశాన్ని ఫలితాల ఆధారంగా అమలు చేయాలని స్పష్టం చేశారు.
36 దేశాల నుంచి 288 మంది నేరస్థుల అప్పగింత
2019 నుంచి 2026 వరకు విదేశాల్లో ఉన్న 288 మంది పరారీలో ఉన్న నేరస్థులను భారత్కు తీసుకొచ్చినట్లు అమిత్ షా తెలిపారు.
కేంద్ర సంస్థలు, రాష్ట్ర పోలీసుల మధ్య మెరుగైన సమన్వయం కారణంగా 2019 నుంచి 2026 వరకు 36 దేశాల నుంచి 288 మంది పరారీలో ఉన్న నేరస్థులను భారత్కు తీసుకొచ్చినట్లు అమిత్ షా తెలిపారు. విదేశాల్లో ఉన్న నిందితులను దేశానికి రప్పించే ప్రక్రియను మరింత వేగవంతం చేసేందుకు కొత్త ఎక్స్ట్రడిషన్ పోర్టల్ను ఆయన ప్రారంభించారు.
అంతర్జాతీయ స్థాయిలో ఆయుధాలు, పేలుడు పదార్థాలు, మాదకద్రవ్యాల అక్రమ రవాణాకు పాల్పడినట్లు పేర్కొన్న షాజాద్ భట్టి నెట్వర్క్కు సంబంధించిన 40కుపైగా మాడ్యూళ్లను ఛేదించినట్లు హోంమంత్రి తెలిపారు. ఈ వ్యవహారాల్లో 15 రాష్ట్రాల్లో 100కుపైగా ఎఫ్ఐఆర్లు నమోదు చేసి, 350 మందిని అరెస్టు చేసినట్లు వెల్లడించారు. ఈ నెట్వర్క్ను యూఏపీఏ కింద ఉగ్రవాద సంస్థగా కేంద్ర ప్రభుత్వం ప్రకటించినట్లు తెలిపారు.
విదేశాల్లో ఉన్న పరారీలోని నేరస్థులను భారత్కు తీసుకురావడంలో కేంద్ర సంస్థలతో కలిసి పనిచేసేందుకు రాష్ట్ర పోలీసు విభాగాలు ప్రత్యేక బృందాలను ఏర్పాటు చేయాలని అమిత్ షా సూచించారు. కేంద్ర-రాష్ట్ర సంస్థల సమన్వయంతో చర్యలను మరింత వేగవంతం చేయాలని పిలుపునిచ్చారు.
