పాక్-చైనా సరిహద్దు కమిషన్ను తిరస్కరించింన భారత్ !
చట్టపరమైన హక్కు లేదని
◉ 1 Views
↗ 0 Shares
‘పాక్-చైనాల మధ్య సరిహద్దే లేదు’.. ఆక్రమిత ప్రాంతాలను ఖాళీ చేయాలని పాక్కు సూచన
న్యూఢిల్లీ, సెప్టెంబర్ 16 (నవజ్యోతి ప్రతినిధి):
పాకిస్థాన్-చైనా సరిహద్దు అంశంపై ఏర్పాటైన ‘జాయింట్ బౌండరీ కమిషన్’ను భారత్ తిరస్కరించింది. ఈ కమిషన్కు భారత భూభాగానికి సంబంధించిన ఏర్పాట్లపై నిర్ణయం తీసుకునే చట్టపరమైన హక్కు లేదని విదేశాంగ మంత్రిత్వ శాఖ స్పష్టం చేసింది. ఇస్లామాబాద్లో పాక్-చైనా సరిహద్దు కమిషన్ తొలి సమావేశం జరిగిన నేపథ్యంలో భారత్ ఈ ప్రకటన చేసింది.
‘పాక్-చైనాల మధ్య సరిహద్దు లేదు’
విదేశాంగ మంత్రిత్వ శాఖ అధికార ప్రతినిధి రణధీర్ జైస్వాల్ మాట్లాడుతూ.. “ఈ అంశంపై భారత్ వైఖరి స్పష్టంగా – స్థిరంగా ఉంది. పాకిస్థాన్-చైనాల మధ్య సరిహద్దు ఉందనే వాదనను భారత్ అంగీకరించదు. చట్టపరమైన ప్రాతిపదిక లేని ఈ కమిషన్ను తిరస్కరిస్తున్నాం” అని తెలిపారు.
జమ్మూకశ్మీర్ – లడఖ్పై స్పష్టమైన వైఖరి
జమ్మూకశ్మీర్ – లడఖ్ కేంద్ర పాలిత ప్రాంతాలు భారత్లో అంతర్భాగాలు అని జైస్వాల్ పునరుద్ఘాటించారు. వాటిపై భారత సార్వభౌమాధికారానికి ఎలాంటి భంగం కలిగించే చర్యలను అంగీకరించబోమని స్పష్టం చేశారు.
1963 పాక్-చైనా ఒప్పందాన్ని అంగీకరించని భారత్
1963లో పాకిస్థాన్-చైనా మధ్య కుదిరిన సరిహద్దు ఒప్పందాన్ని భారత్ ఎన్నడూ గుర్తించలేదని జైస్వాల్ తెలిపారు. ఆ ఒప్పందం ద్వారా షక్స్గామ్ లోయ సహా కొన్ని ప్రాంతాలను పాకిస్థాన్ చైనాకు అప్పగించిందని భారత్ పేర్కొంటోంది. ఈ ఒప్పందం చట్టవిరుద్ధం – చెల్లుబాటు కానిదని భారత్ తన వైఖరిని కొనసాగిస్తోంది.
ఆక్రమిత ప్రాంతాలపై ఎలాంటి చర్యలైనా వ్యతిరేకం
భారత భూభాగానికి సంబంధించిన ప్రాంతాల స్థితిని మార్చేందుకు లేదా ఆక్రమణకు చట్టబద్ధత కల్పించేందుకు చేసే ప్రయత్నాలను తీవ్రంగా వ్యతిరేకిస్తున్నట్లు విదేశాంగ శాఖ తెలిపింది. భారత భూభాగాలకు సంబంధించి చైనా – పాకిస్థాన్ మధ్య జరిగే ఎలాంటి సరిహద్దు సహకారాన్నీ అంగీకరించబోమని స్పష్టం చేసింది.
CPECపైనా భారత్ అభ్యంతరం
పాకిస్థాన్-చైనా ఆర్థిక కారిడార్ (CPEC)ను కూడా భారత్ వ్యతిరేకిస్తూ వస్తోంది. ఈ ప్రాజెక్టులోని కొన్ని ప్రాంతాలు భారత్ పేర్కొంటున్న పాకిస్థాన్ ఆక్రమిత కశ్మీర్ గుండా వెళ్తున్నందున సార్వభౌమాధికారానికి సంబంధించిన సమస్యలు ఉన్నాయని భారత్ చెబుతోంది.
ఆక్రమిత ప్రాంతాలను ఖాళీ చేయాలి
చైనా – పాకిస్థాన్ సరిహద్దు సహకారంపై స్పందిస్తూ.. ఇలాంటి చర్యలకు బదులు భారత్ పేర్కొంటున్న ఆక్రమిత ప్రాంతాలను పాకిస్థాన్ వెంటనే ఖాళీ చేయాలని రణధీర్ జైస్వాల్ పిలుపునిచ్చారు. ఆక్రమిత ప్రాంతాలపై ఎలాంటి సరిహద్దు ఏర్పాట్లకైనా భారత సార్వభౌమాధికారంపై ప్రభావం ఉండదని ఆయన స్పష్టం చేశారు.
