పర్యాటకం.. అభివృద్ధికి కొత్త దారులు
డెస్క్, సెప్టెంబర్ 26 (నవజ్యోతి ప్రతినిధి):
ప్రపంచ దేశాల ఆర్థిక, సామాజిక, సాంస్కృతిక అభివృద్ధిలో పర్యాటక రంగం కీలక పాత్ర పోషిస్తోంది. ఈ రంగం ప్రాధాన్యతను చాటేందుకు ప్రతి సంవత్సరం సెప్టెంబర్ 27న ప్రపంచ పర్యాటక దినోత్సవాన్ని నిర్వహిస్తున్నారు. ప్రకృతి అందాలు, చారిత్రక వారసత్వం, కళలు, సంప్రదాయాలు, జీవన విధానాలను ప్రపంచానికి పరిచయం చేయడంతో పాటు దేశాలు, ప్రజల మధ్య స్నేహ సంబంధాలను పర్యాటకం మరింత బలోపేతం చేస్తోంది.
హోటళ్లు, రవాణా, రెస్టారెంట్లు, హస్తకళలు, పర్యాటక మార్గదర్శక సేవలు సహా అనేక రంగాల్లో ప్రత్యక్ష, పరోక్ష ఉపాధికి పర్యాటకం వేదికగా నిలుస్తోంది. గ్రామీణ, ఆధ్యాత్మిక పర్యాటకం ద్వారా స్థానికులకు కొత్త ఆదాయ అవకాశాలు ఏర్పడుతున్నాయి. తెలంగాణలో చార్మినార్, గోల్కొండ కోట, రామప్ప దేవాలయం, భద్రాచలం, యాదాద్రి, లక్నవరం సరస్సు, బొగత జలపాతం వంటి ప్రాంతాలు పర్యాటకులను ఆకర్షిస్తున్నాయి.
అయితే పర్యాటక ప్రాంతాల్లో ప్లాస్టిక్ వ్యర్థాలు, కాలుష్యం, ప్రకృతి వనరులపై ఒత్తిడి వంటి సమస్యలను నియంత్రించాల్సిన అవసరం ఉంది. ప్రకృతిని కాపాడుతూ, స్థానిక సంస్కృతిని పరిరక్షిస్తూ పర్యాటకాన్ని అభివృద్ధి చేయడమే సుస్థిర పర్యాటక లక్ష్యం. ప్రభుత్వాలు, పర్యాటక సంస్థలు, స్థానిక ప్రజలు, పర్యాటకులు బాధ్యతగా వ్యవహరిస్తే పర్యాటకం ఉపాధి, ఆర్థికాభివృద్ధి, సంస్కృతి పరిరక్షణకు మరింత బలమైన వేదికగా నిలుస్తుంది.
