నాగోయా, సెప్టెంబర్ 22 (నవజ్యోతి ప్రతినిధి): ఆసియా క్రీడల్లో భారత బాక్సర్ సాక్షి చౌదరి అదరగొట్టింది. మహిళల 51 కేజీల విభాగంలో పారిస్ 2024 ఒలింపిక్స్ కాంస్య పతక విజేత – ఫిలిప్పీన్స్కు చెందిన ఐరా విల్లెగాస్ను 5-0తో ఓడించి ప్రీ-క్వార్టర్ఫైనల్కు దూసుకెళ్లింది. రౌండ్-ఆఫ్-32లో సాక్షి ప్రారంభం నుంచే దూకుడుగా బాక్సింగ్ చేస్తూ ప్రత్యర్థిపై ఆధిపత్యం ప్రదర్శించింది.
తొలి రౌండ్లో సాక్షి తన జాబ్లతో విల్లెగాస్ను దూరంగా ఉంచుతూ పంచ్లను కచ్చితంగా సంధించింది. దీంతో ఆ రౌండ్ను 5-0తో తన ఖాతాలో వేసుకుంది. రెండో రౌండ్లో ఫిలిప్పీన్స్ బాక్సర్ దూకుడు పెంచినప్పటికీ సాక్షి సమర్థవంతమైన కౌంటర్ పంచ్లతో ఆధిపత్యాన్ని కొనసాగించింది. రెండో రౌండ్ను కూడా 5-0తో గెలుచుకుంది.
చివరి రౌండ్లో సాక్షి మరింత వ్యూహాత్మకంగా వ్యవహరించింది. అవసరమైన సందర్భాల్లో మాత్రమే దాడి చేస్తూ ఇప్పటికే సాధించిన ఆధిక్యాన్ని కాపాడుకుంది. విల్లెగాస్ ఒక దశలో బలమైన లెఫ్ట్ హుక్ సంధించినా ఫలితం మార్చలేకపోయింది. చివరకు ఐదుగురు న్యాయనిర్ణేతల ఏకగ్రీవ నిర్ణయంతో సాక్షి 5-0 విజయాన్ని అందుకుంది.
ఈ విజయం సాక్షికి మరో ప్రత్యేకతను కూడా తీసుకొచ్చింది. మంగళవారం ఆమె 23వ పుట్టినరోజు కావడంతో అదే రోజున ఒలింపిక్ పతక విజేతపై విజయం సాధించడం విశేషంగా నిలిచింది. గ్లాస్గో కామన్వెల్త్ గేమ్స్లో 51 కేజీల విభాగంలో స్వర్ణం సాధించిన సాక్షి, అంతకుముందు వరల్డ్ బాక్సింగ్ కప్లోనూ బంగారు పతకం గెలిచింది.
సాక్షి తదుపరి రౌండ్లో కజకిస్థాన్కు చెందిన అలువా బాల్కిబెకోవాతో తలపడనుంది. బాల్కిబెకోవా ప్రపంచ స్థాయి బాక్సర్గా ఉన్న నేపథ్యంలో ఈ పోరు సాక్షికి మరో కీలక పరీక్షగా మారనుంది. గురువారం జరిగే రౌండ్-ఆఫ్-16లో సాక్షి బరిలోకి దిగనుంది. 1
