కన్నీళ్లు పెట్టుకున్న శోభారెడ్డి.. సీఎం అపాయింట్మెంట్ కోసం అభ్యర్థన !
“సీఎం సర్.. ఒక్క అపాయింట్మెంట్ ఇవ్వండి”
మిథున అడ్వర్టైజింగ్ ఏజెన్సీ యజమాని కె. శోభారెడ్డి సోషల్ మీడియాలో మరో వీడియో విడుదల చేశారు. వీడియోలో ఆమె కన్నీళ్లు పెట్టుకుంటూ ముఖ్యమంత్రి రేవంత్రెడ్డిని ఉద్దేశించి తనకు ఒక్క అపాయింట్మెంట్ ఇవ్వాలని కోరారు.
తనకు సీఎం రేవంత్రెడ్డి ఒక్క అపాయింట్మెంట్ ఇస్తే మున్సిపల్ శాఖలో జరుగుతున్నట్లు తాను చెబుతున్న అవినీతి వ్యవహారాలకు సంబంధించిన ఆధారాలను సమర్పిస్తానని శోభారెడ్డి వీడియోలో పేర్కొన్నారు. తన సమస్యలను ముఖ్యమంత్రికి నేరుగా వివరించాలనుకుంటున్నట్లు తెలిపారు.
తనను గెస్ట్హౌస్కు రావాలని కోరిన వ్యక్తి గురించి కూడా ముఖ్యమంత్రికే నేరుగా చెబుతానని ఆమె అన్నారు. తనకు ఎదురైన పరిణామాలపై సోషల్ మీడియాలో దుష్ప్రచారం చేయవద్దని కోరారు.
తన వెనుక ఎలాంటి రాజకీయ పార్టీ లేదని శోభారెడ్డి స్పష్టం చేశారు. కాంగ్రెస్ నేత వల్ల తాను ఇబ్బందులు ఎదుర్కొన్నది నిజమేనని పేర్కొన్నారు. అయితే ఈ వ్యవహారాన్ని రాజకీయంగా చూడవద్దని, తనకు న్యాయం చేయాలని కోరారు.
ఫయీం ఖురేషి, రోహిన్ రెడ్డిలను తాను ‘అన్నా’ అని పిలుస్తానని శోభారెడ్డి తెలిపారు. అడ్వర్టైజింగ్ కాంట్రాక్ట్ విషయంలో వారిద్దరినీ సాయం కోరగా చేస్తామని చెప్పారని, అయితే ఆ తర్వాత సహాయం చేయలేదని పేర్కొన్నారు. దీంతో సీఎం సన్నిహితుడిగా భావించిన మరో నేతను సంప్రదించాల్సి వచ్చిందని ఆమె వివరించారు.
తన కుటుంబ పరిస్థితిని కూడా శోభారెడ్డి వీడియోలో ప్రస్తావించారు. తనకు ముగ్గురు పిల్లలు ఉన్నారని, తాను పేదరికం నుంచి వచ్చానని చెప్పారు. తనపై సోషల్ మీడియాలో దుష్ప్రచారం చేయవద్దని మరోసారి విజ్ఞప్తి చేశారు.
చివరగా ముఖ్యమంత్రి రేవంత్రెడ్డిని ఉద్దేశించి “సీఎం సర్.. ఒక్క అపాయింట్మెంట్ ఇవ్వండి ప్లీజ్” అంటూ శోభారెడ్డి కన్నీళ్లు పెట్టుకున్నారు. వీడియోలో ఆమె చేసిన వ్యాఖ్యలు ప్రస్తుతం సోషల్ మీడియాలో చర్చనీయాంశంగా మారాయి.
ఒక్కసారి కలిసే అవకాశం ఇవ్వాలని విజ్ఞప్తి
మున్సిపల్ శాఖకు సంబంధించిన ఆధారాలు ఇస్తానని వెల్లడి
తనను రమ్మన్న వ్యక్తి గురించి సీఎంకే చెబుతానని ప్రకటన
తన వెనుక ఏ రాజకీయ పార్టీ లేదని స్పష్టీకరణ
