వెనక్కి వెళ్తున్న రుతుపవనాలు.. ముందున్న వర్షాలు!

నైరుతి రుతుపవనాల ఉపసంహరణ ప్రక్రియ ప్రారంభమైంది. సెప్టెంబర్‌ 19న పశ్చిమ రాజస్థాన్‌లోని కొన్ని ప్రాంతాల నుంచి రుతుపవనాలు వెనక్కి వెళ్లడం ప్రారంభించినట్లు భారత వాతావరణ శాఖ (ఐఎండీ) ధ్రువీకరించింది. సాధారణంగా సెప్టెంబర్‌ 17న ఉపసంహరణ ప్రారంభం కావాల్సి ఉండగా.. ఈసారి రెండు రోజులు ఆలస్యంగా ప్రక్రియ మొదలైంది.

రానున్న మూడు – నాలుగు రోజుల్లో రాజస్థాన్‌, పంజాబ్‌, సౌరాష్ట్ర – కచ్‌లోని మరికొన్ని ప్రాంతాల నుంచి రుతుపవనాలు మరింతగా వెనక్కి వెళ్లేందుకు వాతావరణ పరిస్థితులు అనుకూలంగా ఉన్నాయని ఐఎండీ తెలిపింది.

మరోవైపు రుతుపవనాలు వాయవ్య భారతదేశం నుంచి నిష్క్రమిస్తున్నప్పటికీ.. బంగాళాఖాతంలో ఏర్పడిన వాతావరణ వ్యవస్థ ప్రభావంతో దక్షిణ, తూర్పు భారతదేశంలో వర్షాలు కొనసాగనున్నాయి. సెప్టెంబర్‌ 20న దక్షిణాది రాష్ట్రాల్లో వర్షాలు, ఉరుములు, పిడుగులు – బలమైన గాలులు నమోదయ్యే అవకాశం ఉందని వాతావరణ శాఖ వెల్లడించింది.

దక్షిణ భారతదేశంలోని పలు ప్రాంతాలతో పాటు అండమాన్‌ – నికోబార్‌ దీవుల్లో ఆదివారం భారీ వర్షాలు, ఉరుములతో కూడిన వానలు కురిసే అవకాశం ఉంది. తీర ఆంధ్రప్రదేశ్‌, కర్ణాటక, కేరళ, తమిళనాడు, పుదుచ్చేరి, కారైకాల్‌, తెలంగాణతో పాటు అండమాన్‌ – నికోబార్‌ దీవుల్లో అక్కడక్కడ భారీ వర్షాలు పడే అవకాశం ఉందని ఐఎండీ అంచనా వేసింది.

ఆయా ప్రాంతాల్లో పిడుగులు, ఉరుములతో కూడిన వర్షంతో పాటు గంటకు 40 – 50 కిలోమీటర్ల వేగంతో ఈదురుగాలులు వీచే అవకాశం ఉంది. ఆంధ్రప్రదేశ్‌, తెలంగాణలో పగటిపూట బలమైన ఉపరితల గాలులు వీస్తాయని వాతావరణ శాఖ తెలిపింది.

తూర్పు రాజస్థాన్‌, గంగా పరివాహక పశ్చిమ బెంగాల్‌, ఝార్ఖండ్‌, కొంకణ్‌ – గోవా, మధ్యప్రదేశ్‌, ఉత్తర కర్ణాటక, తెలంగాణ, విదర్భ ప్రాంతాల్లో గంటకు 30 – 40 కిలోమీటర్ల వేగంతో గాలులతో కూడిన ఉరుములు – పిడుగులు సంభవించే అవకాశం ఉందని ఐఎండీ తెలిపింది. ఈశాన్య రాష్ట్రాల్లోనూ ఉరుములు – పిడుగులతో కూడిన వాతావరణం ఉండే అవకాశం ఉంది.

ఇదిలా ఉండగా.. ఉత్తర అండమాన్‌ సముద్రంలో ఏర్పడిన వాతావరణ వ్యవస్థ రానున్న రోజుల్లో మరింత బలపడనుంది. సెప్టెంబర్‌ 18న ఏర్పడిన అల్పపీడన ప్రాంతం సెప్టెంబర్‌ 21 నాటికి వాయుగుండంగా, సెప్టెంబర్‌ 22 నాటికి తీవ్ర వాయుగుండంగా బలపడే అవకాశం ఉందని ఐఎండీ తెలిపింది.

ఈ వ్యవస్థ పశ్చిమ – వాయవ్య దిశగా కదులుతూ ఒడిశా – ఉత్తర ఆంధ్రప్రదేశ్‌ తీరాల వైపు వెళ్లి సెప్టెంబర్‌ 23 ప్రాంతంలో తీరాన్ని దాటే అవకాశం ఉందని వాతావరణ శాఖ అంచనా వేసింది. దీని ప్రభావంతో వచ్చే వారం తూర్పు భారతదేశంలో వర్షపాతం పెరిగే అవకాశం ఉంది.