ఎస్ఐఆర్ వివాదంపై ఎన్నికల సంఘం కీలక నిర్ణయాలు..సమావేశాల అజెండా ముందే.. మినిట్స్ తర్వాత!
ఎస్ఐఆర్ (స్పెషల్ ఇంటెన్సివ్ రివిజన్)పై కొనసాగుతున్న వివాదం నేపథ్యంలో కేంద్ర ఎన్నికల సంఘం కీలక నిర్ణయాలు ప్రకటించింది. ఇకపై కమిషన్ నిర్వహించే అన్ని సమావేశాల అజెండాలను ముందుగానే సభ్యులకు పంపుతామని, సమావేశాల అనంతరం మినిట్స్ను జారీ చేస్తామని శనివారం స్పష్టం చేసింది. ఎన్నికల సంఘంలో చీఫ్ ఎలక్షన్ కమిషనర్ జ్ఞానేశ్ కుమార్, ఎన్నికల కమిషనర్లు సుఖ్బీర్ సింగ్ సంధు, వివేక్ జోషిల మధ్య విభేదాలున్నాయంటూ వచ్చిన నివేదికల నేపథ్యంలో ఈ ప్రకటన వెలువడింది.
ఎస్ఐఆర్కు సంబంధించిన అన్ని కీలక నిర్ణయాలను ముగ్గురు కమిషనర్లు ఏకగ్రీవంగా ఆమోదించారని ఈసీ పేర్కొంది. 2025 జూన్ 24న జారీ చేసిన ఎస్ఐఆర్ ఉత్తర్వులకు కూడా కమిషన్ ఏకగ్రీవ ఆమోదం ఉందని, ఈ అంశంపై సుప్రీంకోర్టు 2026 మే 27న ఇచ్చిన ఉత్తర్వులోనూ సంబంధిత అంశాలను పరిశీలించిందని తెలిపింది. కమిషన్లో భిన్నాభిప్రాయాలు, సూచనలు ఉండటం సంస్థాగత చర్చల్లో సాధారణమేనని పేర్కొంది.
ఇద్దరు ఎన్నికల కమిషనర్లు సుఖ్బీర్ సింగ్ సంధు, వివేక్ జోషి క్యాబినెట్ సెక్రటరీకి పంపిన లేఖలు కమిషన్ విధానం లేదా ఐటీ విభాగానికి సంబంధించిన విధానపరమైన అంశాలు కావని ఈసీ వివరించింది. ఎన్నికల సంఘానికి డిప్యుటేషన్పై వచ్చిన ఒక అధికారి పనితీరుకు సంబంధించిన పరిపాలనా అంశమేనని స్పష్టం చేసింది.
ఎస్ఐఆర్లో మ్యాప్ కాని రికార్డులు లేదా ఇతర వ్యత్యాసాల కారణంగా నోటీసులు అందుకున్న ఓటర్లు ఇకపై తప్పనిసరిగా ఈఆర్ఓ, ఏఈఆర్ఓ కార్యాలయాలకు హాజరుకావాల్సిన అవసరం లేదని ఈసీ తెలిపింది. బూత్ లెవల్ అధికారులు (బీఎల్ఓలు) సంబంధిత ఓటర్ల ఇళ్లకు వెళ్లి అవసరమైన పత్రాలను సేకరించి ఈసీఐనెట్లో అప్లోడ్ చేస్తారని పేర్కొంది. ప్రత్యేక పరిస్థితుల్లో మాత్రమే విచారణ నిర్వహిస్తామని, సాధ్యమైనంత వరకు ఆన్లైన్లోనే చేపడతామని వెల్లడించింది. ఓటరు అనుమతిస్తే కుటుంబంలోని వయోజన సభ్యుడు కూడా విచారణకు హాజరుకావచ్చని తెలిపింది.
రాత్రి ఆశ్రయ కేంద్రాల్లో ఉండేవారు, కార్మికులు, నిరుపేదలు, నిరాశ్రయులు తదితరులకు సహాయం అందించేందుకు జిల్లా ఎన్నికల అధికారులు అవసరమైన ప్రాంతాల్లో ప్రత్యేక హెల్ప్డెస్క్లు, క్యాంపులు ఏర్పాటు చేయాలని ఈసీ ఆదేశించింది. ఆన్లైన్ విచారణ సదుపాయాలను కూడా మరింత బలోపేతం చేయనున్నట్లు తెలిపింది.
ఓటర్ల డేటాను నిర్వహించే ఈసీఐనెట్ వ్యవస్థను సమీక్షించేందుకు సీనియర్ డిప్యూటీ ఎలక్షన్ కమిషనర్ నేతృత్వంలో కమిటీ ఏర్పాటు చేయాలని నిర్ణయించింది. ఇందులో ఐఐటీ లేదా ఐఐఐటీకి చెందిన స్వతంత్ర నిపుణుడిని చేర్చనున్నట్లు తెలిపింది. సంబంధిత చట్టాలు, నిబంధనలకు అనుగుణంగా ఈసీఐనెట్ పనిచేస్తుందా అనే అంశాన్ని కమిటీ పరిశీలించనుంది. ఫీల్డ్ అధికారులకు వారి చట్టబద్ధ అధికారాలకు అనుగుణంగా రోల్ ఆధారిత యాక్సెస్ కొనసాగుతుందని ఈసీ స్పష్టం చేసింది.
కొత్త ఐటీ మాడ్యూళ్లు, పోర్టల్స్ రూపకల్పనకు సంబంధించిన ప్రతిపాదనలను ఇకపై కమిషన్ ఆమోదానికి ముందు కమిటీ ఆఫ్ ఆఫీసర్స్ పరిశీలించాలని నిర్ణయించింది. రాష్ట్రాల చీఫ్ ఎలక్టోరల్ అధికారుల సూచనల మేరకు ఈసీఐనెట్లో ఇప్పటికే పలు మార్పులు చేశామని, ఫీల్డ్ అధికారులకు అవసరమైన మరిన్ని సౌకర్యాలను కూడా అందుబాటులోకి తీసుకువస్తామని పేర్కొంది.
ఎస్ఐఆర్ ప్రక్రియలో ఢిల్లీ, మహారాష్ట్రలకు గడువులను కూడా పొడిగించింది. ఢిల్లీలో క్లెయిమ్స్, అభ్యంతరాలు దాఖలు చేసేందుకు గడువును అక్టోబర్ 30, 2026 వరకు, వాటి పరిష్కారానికి నవంబర్ 30 వరకు పొడిగించింది. మహారాష్ట్రలో క్లెయిమ్స్, అభ్యంతరాల దాఖలుకు అక్టోబర్ 12 వరకు, వాటి పరిష్కారానికి నవంబర్ 10 వరకు గడువు ఇచ్చింది.
ఎన్నికల సంఘంలోని అంతర్గత విభేదాలపై వచ్చిన నివేదికలో సంధు, జోషి గత పది నెలల్లో కనీసం 14 సందర్భాల్లో ఓటర్ల జాబితాల నిర్వహణ, కొత్త ఓటర్ల నమోదు, పేర్ల తొలగింపు-పునరుద్ధరణ, ఫారమ్-6 మార్పులు, ఓటర్ల డేటా నిర్వహణ తదితర అంశాలపై అభ్యంతరాలు వ్యక్తం చేసినట్లు పేర్కొంది. అయితే ఈసీ తాజా ప్రకటనలో మాత్రం ఎస్ఐఆర్కు సంబంధించిన నిర్ణయాలన్నీ కమిషన్ ఏకగ్రీవ ఆమోదంతోనే జరిగాయని స్పష్టం చేసింది.
ఫారమ్-6కు జత చేసిన ఎస్ఐఆర్ డిక్లరేషన్ను సుప్రీంకోర్టు సమర్థించిందని ఈసీ తెలిపింది. ఎస్ఐఆర్ లేని కాలంలో మాత్రం 1960 నాటి రిజిస్ట్రేషన్ ఆఫ్ ఎలక్టర్స్ రూల్స్ ప్రకారం నిర్దేశించిన ఫారమ్లనే వినియోగిస్తామని పేర్కొంది. అలాగే కమిషన్ అధికారుల వార్షిక పనితీరు నివేదికలను ప్రతి ఏడాది డిసెంబర్ 31లోగా పూర్తి చేయడం, అధికారుల విదేశీ పర్యటనలకు కమిషన్ అనుమతి తీసుకోవడం, కమిషనర్లు జారీ చేసే ఆదేశాలను అధికారులు తప్పనిసరిగా అమలు చేయడం వంటి నిర్ణయాలను కూడా ప్రకటించింది.
