కుత్బుల్లాపూర్, సెప్టెంబర్ 29 (నవజ్యోతి ప్రతినిధి):
నగరం నడిబొడ్డున కొన్ని కాలనీలకు రోడ్లు లేక ప్రజలు ఇబ్బందులు పడుతుంటే.. సుచిత్ర గాయత్రినగర్లో పరిస్థితి అందుకు భిన్నంగా ఉంది. రోడ్డు ఉన్నా.. దానిపై నడవలేని దుస్థితి నెలకొంది. నెలల తరబడి రహదారులపై మురుగునీరు ప్రవహిస్తుండటంతో కాలనీవాసులు నిత్యం ఇబ్బందులు పడుతున్నారు. ఇంటి నుంచి బయటకు రావాలంటే మురుగు ప్రవాహాన్ని దాటాల్సి వస్తోందని వాపోతున్నారు. పసిపిల్లలను వెంటబెట్టుకుని మురుగునీటిలో నడవాల్సిన పరిస్థితి ఏర్పడటంతో ప్రజలు తీవ్ర ఆవేదన వ్యక్తం చేస్తున్నారు.
జీడిమెట్ల సర్కిల్ పరిధిలోని గాయత్రినగర్లో రోడ్లపై నిరంతరం మురుగునీరు ప్రవహిస్తుండటంతో పాదచారులు, వాహనదారులు తీవ్ర ఇబ్బందులు ఎదుర్కొంటున్నారు. రహదారి ఎక్కడుందో.. మురుగు ఎక్కడ మొదలవుతుందో తెలియని పరిస్థితి నెలకొంది. వాహనాలు వెళ్లే సమయంలో మురుగునీరు చుట్టుపక్కల చిమ్ముతుండటంతో ఇబ్బందులు మరింత పెరుగుతున్నాయని స్థానికులు చెబుతున్నారు.
ఫిర్యాదులు చేసినా.. మారని పరిస్థితి!
మురుగునీటి సమస్యపై పలుమార్లు హెచ్ఎండబ్ల్యూఎస్ఎస్బీ అధికారులకు తెలియజేసినా పరిష్కారం కాలేదని కాలనీవాసులు ఆరోపిస్తున్నారు. నెలల తరబడి సమస్య కొనసాగుతున్నా క్షేత్రస్థాయిలో అధికారులు పర్యటించి శాశ్వత పరిష్కారం చూపడం లేదని వాపోతున్నారు.
మురుగునీరు రోడ్లపై నిలిచి ప్రవహిస్తుండటంతో దుర్వాసన, దోమల సమస్య పెరుగుతోందని స్థానికులు అంటున్నారు. దీంతో పారిశుధ్య పరిస్థితులపై ఆందోళన వ్యక్తం చేస్తున్నారు. ముఖ్యంగా చిన్నారులు, వృద్ధులు మురుగునీటిని దాటుకుంటూ రాకపోకలు సాగించాల్సి రావడం మరింత ఇబ్బందికరంగా మారిందని చెబుతున్నారు.
రోడ్లు ప్రజల రాకపోకల కోసం ఉండాలి తప్ప.. మురుగునీటి ప్రవాహానికి కాదని స్థానికులు పేర్కొంటున్నారు. తాత్కాలిక చర్యలతో సమస్యను పక్కన పెట్టకుండా మురుగునీరు రోడ్డుపైకి ఎందుకు వస్తుందో గుర్తించి శాశ్వత పరిష్కారం చూపాలని కోరుతున్నారు.
పసిపిల్లను మురుగులో నడిపించే పరిస్థితికి ముగింపు పలికి.. రోడ్డుపై స్వేచ్ఛగా నడిచే హక్కును కల్పించాలని గాయత్రినగర్ వాసులు అధికారులను కోరుతున్నారు. అధికారులు వెంటనే స్పందించి సమస్యను పరిష్కరించాలని విజ్ఞప్తి చేస్తున్నారు.
