సమ్మె ఉంటుందనే పరిస్థితిలో ఆదివారం విధులకు హాజరైన బ్యాంకు ఉద్యోగులకు ఇప్పుడు కొత్త ఇబ్బంది ఎదురైంది. సెప్టెంబర్ 27 ఆదివారం ప్రభుత్వ రంగ బ్యాంకులు, ప్రాంతీయ గ్రామీణ బ్యాంకుల్లో విధులు నిర్వహించగా.. అదే రోజు రాత్రి ఇండియన్ బ్యాంక్స్ అసోసియేషన్ (ఐబీఏ)-యూఎఫ్బీయూ మధ్య చర్చల అనంతరం సెప్టెంబర్ 28-30 తేదీల్లో జరగాల్సిన మూడు రోజుల సమ్మె వాయిదా పడింది. దీంతో ఆదివారం సెలవు లేకుండా పనిచేసిన ఉద్యోగులు.. సమ్మె వాయిదా పడటంతో సోమవారం మళ్లీ సాధారణ విధులకు హాజరు కావాల్సిన పరిస్థితి ఏర్పడిందని ఉద్యోగ సంఘాలు ఆవేదన వ్యక్తం చేస్తున్నాయి.
సమ్మె జరగాల్సి ఉందన్న నేపథ్యంలో సెప్టెంబర్ 27న ఆదివారం కూడా బ్యాంకులను పనిచేయించాలని నిర్ణయించారు. దీంతో పలువురు ఉద్యోగులు తమ సాధారణ వారాంతపు సెలవును వదులుకుని విధులకు హాజరయ్యారు. అయితే ఆదివారం రాత్రి సమ్మె వాయిదా పడటంతో.. ఆ రోజు చేసిన అదనపు పని తర్వాత వెంటనే సాధారణ పనిదినాలు కొనసాగాల్సిన పరిస్థితి ఏర్పడింది. దీంతో ఉద్యోగులకు వరుసగా పని దినాలు పెరిగి, వారాంతపు విశ్రాంతి కోల్పోతున్నామని వారు పేర్కొంటున్నారు.
ఈ అంశంపై ఇప్పటికే నేషనల్ ఆర్గనైజేషన్ ఆఫ్ బ్యాంక్ వర్కర్స్ (NOBW), నేషనల్ ఆర్గనైజేషన్ ఆఫ్ బ్యాంక్ ఆఫీసర్స్ (NOBO), ఆల్ ఇండియా గ్రామీణ బ్యాంక్ వర్కర్స్ ఆర్గనైజేషన్ (AIGBWO), ఆల్ ఇండియా గ్రామీణ బ్యాంక్ ఆఫీసర్స్ ఆర్గనైజేషన్ (AIGBOO) ఆందోళన వ్యక్తం చేశాయి. సెప్టెంబర్ 23న ఆర్థిక సేవల విభాగానికి సమర్పించిన సంయుక్త ప్రాతినిధ్యంలో ఆదివారం పనిచేయించడం వల్ల ఉద్యోగుల సాధారణ వారాంతపు విశ్రాంతికి భంగం కలుగుతుందని పేర్కొన్నాయి.
ముఖ్యంగా సెప్టెంబర్ నెలాఖరు అర్ధవార్షిక ముగింపు నేపథ్యంలో బ్యాంకుల్లో పనిభారం ఇప్పటికే ఎక్కువగా ఉందని సంఘాలు తెలిపాయి. ఇలాంటి సమయంలో ఆదివారం కూడా విధులు నిర్వహించాల్సి రావడం ఉద్యోగులపై శారీరక అలసట, మానసిక ఒత్తిడిని పెంచుతుందని అభ్యంతరం వ్యక్తం చేశాయి. ఆదివారం విధులు చేయించినప్పుడు ప్రత్యామ్నాయ విశ్రాంతి లేదా సెలవు కల్పించే అంశాన్ని పరిగణనలోకి తీసుకోవాలని కోరాయి.
మరోవైపు ఐబీఏ-యూఎఫ్బీయూ చర్చల అనంతరం మూడు రోజుల సమ్మె, తదుపరి ఆందోళన కార్యక్రమాలు వాయిదా పడ్డాయి. దీంతో ఆదివారం పనిచేసిన ఉద్యోగులకు ఇప్పుడు అసలు విశ్రాంతి ఎప్పుడు అన్న ప్రశ్న ముందుకు వస్తోంది. ఖాతాదారుల సేవల కోసం సెలవు రోజున బ్యాంకులు పనిచేయాల్సిన పరిస్థితి వచ్చినా.. ఆ రోజు విధులు నిర్వహించిన ఉద్యోగులకు తగిన ప్రత్యామ్నాయ విశ్రాంతి కల్పించాలని బ్యాంకు ఉద్యోగ సంఘాలు కోరుతున్నాయి.
