ఫాలోవర్ల కోసం మావోయిస్టుల పేరుతో నకిలీ లేఖలు

మెదక్, సెప్టెంబర్ 25 (నవజ్యోతి ప్రతినిధి):

సోషల్ మీడియాలో వ్యూస్, ఫాలోవర్లు పెంచుకోవాలనే ఉద్దేశంతో మావోయిస్టుల పేరుతో నకిలీ బెదిరింపు లేఖలు సృష్టించిన ఇద్దరు యువకులను మెదక్ పోలీసులు అరెస్టు చేశారు. తూప్రాన్ ప్రాంతంలో ఈ లేఖలు కలకలం రేపడంతో పోలీసులు ప్రత్యేక దర్యాప్తు చేపట్టారు.

పోలీసుల వివరాల ప్రకారం, నిందితులు ప్రచారం పొందేందుకు మావోయిస్టుల పేరుతో బెదిరింపు లేఖలను రూపొందించి సామాజిక మాధ్యమాల్లో ప్రచారంలోకి తెచ్చినట్లు గుర్తించారు. లేఖలు నిజమైనవిగా కనిపించేలా రూపొందించి ప్రజల్లో భయాందోళనలు కలిగించే ప్రయత్నం చేసినట్లు దర్యాప్తులో వెల్లడైంది.

కేసును ఛేదించేందుకు పోలీసులు డిజిటల్ సమాచారం, సామాజిక మాధ్యమ ఖాతాలు, ఇతర సాంకేతిక ఆధారాలను విశ్లేషించి నిందితులను గుర్తించారు. అనంతరం ఇద్దరిని అదుపులోకి తీసుకుని విచారించినట్లు తెలిపారు. ఈ వ్యవహారంలో మరెవరైనా ప్రమేయం ఉందా అనే కోణంలోనూ విచారణ కొనసాగిస్తున్నట్లు పేర్కొన్నారు.

కేసు దర్యాప్తులో కీలకంగా వ్యవహరించిన పోలీసు సిబ్బందిని జిల్లా ఎస్పీ డి.వి.శ్రీనివాసరావు అభినందించారు. సోషల్ మీడియాలో వ్యూస్, లైకులు, ఫాలోవర్ల కోసం అసత్య సమాచారం సృష్టించడం చట్టపరమైన సమస్యలకు దారితీస్తుందని హెచ్చరించారు. ప్రజలు సామాజిక మాధ్యమాలను బాధ్యతాయుతంగా వినియోగించాలని, అనుమానాస్పద సమాచారం కనిపిస్తే వెంటనే పోలీసులకు తెలియజేయాలని సూచించారు.