విజయవాడ బస్‌స్టాండ్‌లో పేలుడు పదార్థాల కలకలం!
నరసరావుపేట నుంచి విజయవాడకు వచ్చిన ఉత్తరప్రదేశ్‌కు చెందిన అఫీక్‌ అలీ పొరపాటున మరో ప్రయాణికుడి బ్యాగ్‌ను తీసుకెళ్లినట్లు సమాచారం. అనంతరం బ్యాగ్‌ను పరిశీలించగా అందులో అనుమానాస్పద పేలుడు పదార్థాలు కనిపించాయి.
వెంటనే అప్రమత్తమైన అఫీక్‌ అలీ బ్యాగ్‌ను పోలీసులకు అప్పగించినట్లు తెలుస్తోంది.
పోలీసులు బ్యాగ్‌ను తనిఖీ చేయగా 46 జెలాటిన్‌ స్టిక్స్‌, 50 ఎలక్ట్రిక్‌ డిటోనేటర్లు ఉన్నట్లు గుర్తించారు. వీటిని సాధారణంగా మైనింగ్‌, బ్లాస్టింగ్‌ కార్యకలాపాల్లో వినియోగిస్తారు.
అసలు బ్యాగ్‌ ఎవరిది? పేలుడు పదార్థాలను ఎవరు తీసుకొచ్చారు? వాటిని ఎక్కడికి తరలిస్తున్నారు? అనే కోణాల్లో పోలీసులు దర్యాప్తు చేస్తున్నారు. బస్‌స్టాండ్‌కు పేలుడు సామగ్రి ఎలా చేరిందన్న అంశంపైనా అధికారులు ఆరా తీస్తున్నారు.
పేలుడు పదార్థాలను స్వాధీనం చేసుకున్న పోలీసులు వాటి మూలం, వాటిని తరలిస్తున్న వ్యక్తి, ప్రయాణ మార్గం తదితర వివరాలను సేకరిస్తున్నారు. బస్‌స్టాండ్‌లోని అందుబాటులో ఉన్న సమాచారం, ప్రయాణ వివరాలు తదితర అంశాలను పరిశీలించే అవకాశం ఉంది.
