న్యూఢిల్లీ, అక్టోబర్ 22 (నవజ్యోతి ప్రతినిధి): జాతీయ రహదారుల నిర్మాణంలో నాణ్యతను పెంచడంతోపాటు కాంట్రాక్టర్ల పనితీరును ప్రోత్సహించే లక్ష్యంతో కేంద్ర ప్రభుత్వం ఇంజినీరింగ్‌, ప్రొక్యూర్‌మెంట్‌, కన్‌స్ట్రక్షన్‌ (ఈపీసీ) ప్రాజెక్టుల నిబంధనల్లో మార్పులు తీసుకొచ్చింది. కాంట్రాక్టర్ల పనితీరు రేటింగ్‌ను బట్టి వారు సమర్పించాల్సిన పనితీరు హామీ డిపాజిట్‌ను 3, 4, 5 శాతాలుగా నిర్ణయించింది. ఇప్పటివరకు అన్ని ప్రాజెక్టులకూ ఒకే విధంగా 5 శాతం డిపాజిట్‌ అమల్లో ఉండగా, సవరించిన నమూనా ఒప్పందం ప్రకారం మెరుగైన రేటింగ్ ఉన్న సంస్థలకు ఆర్థిక వెసులుబాటు కలగనుంది.
రేటింగ్‌ను బట్టి డిపాజిట్‌ శాతం
- 80 శాతానికి పైగా రేటింగ్: ప్రాజెక్టు విలువలో 3 శాతం.
- 70 నుంచి 80 శాతం మధ్య: 4 శాతం.
- 70 శాతం కంటే తక్కువ: 5 శాతం.
ప్రాణాంతక ప్రమాదాలకు జరిమానాలు
కొత్త నిబంధనల్లో భాగంగా జాతీయ రహదారులపై ప్రాణాంతక ప్రమాదాలు జరిగిన సందర్భాల్లో కాంట్రాక్టర్లపై జరిమానాలు విధించే నిబంధనను కూడా చేర్చారు. పరిహారం చెల్లింపులకు గణన ఆధారిత విధానాన్ని ప్రవేశపెట్టి, దానికి గరిష్ఠ పరిమితిని నిర్ణయించారు. భూసేకరణ ప్రమాణాలను మెరుగుపరచడంతోపాటు కీలక ముడిసరుకుల ధరల్లో మార్పులకు అనుగుణంగా కాంట్రాక్టు మొత్తాలను సవరించే విధానాన్ని తీసుకొచ్చారు.
కాంట్రాక్టర్లకు వెసులుబాటు.. వివాదాలపై పరిమితులు
సవరించిన ఈపీసీ విధానంలో కాంట్రాక్టర్లకు ఆర్థికపరమైన మద్దతు కల్పించే చర్యలతోపాటు ప్రభుత్వ ప్రయోజనాలను కాపాడే నిబంధనలూ ఉన్నాయని క్రిసిల్‌ ఇంటెలిజెన్స్‌ సీనియర్‌ డైరెక్టర్‌, కన్సల్టింగ్‌ విభాగం గ్లోబల్‌ హెడ్‌ జగన్నారాయణ పద్మనాభన్‌ అభిప్రాయపడ్డారు. పనుల ఆలస్యానికి సంబంధించిన అదనపు వ్యయాల లెక్కింపు విధానం వల్ల చెల్లింపులపై స్పష్టత పెరగవచ్చని, అయితే పెద్ద మొత్తాల వివాదాల్లో మధ్యవర్తిత్వానికి సంబంధించిన పరిమితులు, పరిహారం మరియు ధరల సవరణలపై విధించిన గరిష్ఠ పరిమితులు కాంట్రాక్టర్ల క్లెయిమ్‌ల వసూళ్లను ప్రభావితం చేయవచ్చని పేర్కొన్నారు.
ఈపీసీ ప్రాజెక్టుల కేటాయింపుపై కేంద్రం దృష్టి
ప్రస్తుత ఆర్థిక సంవత్సరంలో ఈపీసీ విధానంలో అత్యధిక సంఖ్యలో జాతీయ రహదారి ప్రాజెక్టులను కేటాయించాలని కేంద్రం లక్ష్యంగా పెట్టుకుంది. భారత జాతీయ రహదారుల ప్రాధికార సంస్థ (ఎన్‌హెచ్‌ఏఐ) కేటాయింపుల కోసం 26 ఈపీసీ ప్రాజెక్టులు, 21 హైబ్రిడ్‌ యాన్యుటీ మోడల్‌ (హెచ్‌ఏఎం) ప్రాజెక్టులు, ఏడు బిల్డ్‌-ఆపరేట్‌-ట్రాన్స్‌ఫర్‌ (బీఓటీ) ప్రాజెక్టులను గుర్తించింది. ఈపీసీ ప్రాజెక్టుల నమూనా ఒప్పందంలో చివరిసారిగా 2022లో ప్రధాన మార్పులు చేపట్టగా, తాజా సవరణలు రహదారుల నిర్మాణంలో నాణ్యత, జవాబుదారీతనం పెంచడంతోపాటు ప్రాజెక్టుల అమలులో ఉన్న అడ్డంకులను తగ్గించే లక్ష్యంతో తీసుకొచ్చారు.
