మధ్యప్రాచ్య యుద్ధం ముగిస్తే.. భారత్‌, చైనాలో ఎల్‌ఎన్‌జీ డిమాండ్‌ పుంజుకునే అవకాశం!
మధ్యప్రాచ్య సంక్షోభానికి ముందు ఆసియా స్పాట్‌ ఎల్‌ఎన్‌జీ ధరలు సుమారు ఒక్క MMBtuకి 10 డాలర్లుగా ఉండగా.. ప్రస్తుతం దాదాపు 30 డాలర్లకు చేరాయి. శీతాకాలానికి ముందు యూరప్‌తో పాటు ఆసియా దేశాలు పరిమితంగా ఉన్న ఎల్‌ఎన్‌జీ సరఫరాల కోసం పోటీ పడుతుండటంతో ధరలపై మరింత ఒత్తిడి ఏర్పడుతోంది.
భారత్‌లో ఎల్‌ఎన్‌జీ ధరలు భారీగా పెరగడం వల్ల ధరల విషయంలో సున్నితంగా స్పందించే పరిశ్రమలు ఇతర ఇంధనాల వైపు మళ్లుతున్నాయని గెయిల్‌ చైర్మన్‌, మేనేజింగ్‌ డైరెక్టర్‌ దీపక్‌ గుప్తా తెలిపారు.
యుద్ధం ప్రారంభమైన సమయంలో భారత్‌ గ్యాస్‌ వినియోగాన్ని కొంత పరిమితం చేయాల్సి వచ్చినప్పటికీ, ఇతర దేశాల నుంచి ఎల్‌ఎన్‌జీ కార్గోలను సమీకరించే సామర్థ్యాన్ని పెంచుకోవడంతో దాదాపు 90–95 శాతం సరఫరాలను తిరిగి కొనసాగించగలిగామని గుప్తా పేర్కొన్నారు.
ఖతార్‌, యునైటెడ్‌ అరబ్‌ ఎమిరేట్స్‌ నుంచి వచ్చే ఎల్‌ఎన్‌జీ సరఫరాలకు హార్ముజ్‌ జలసంధి సంక్షోభం అడ్డంకిగా మారడంతో గెయిల్‌, పెట్రోచైనా తమ ట్రేడింగ్‌ బృందాలను ప్రత్యామ్నాయ ఎల్‌ఎన్‌జీ కార్గోలను వెతికేందుకు రంగంలోకి దించాయి.
ప్రపంచ ఎల్‌ఎన్‌జీ సరఫరాలో గతంలో సుమారు ఐదో వంతు హార్ముజ్‌ మార్గం ద్వారా రవాణా అయ్యేది. ఈ మార్గంలో అంతరాయాలు ఏర్పడటంతో అంతర్జాతీయ మార్కెట్‌పై ప్రభావం పడుతోంది.
పెట్రోచైనా ఇంటర్నేషనల్‌ సీఈఓ లువో యిజౌ మాట్లాడుతూ.. ఎల్‌ఎన్‌జీ ధరలు సాధారణ స్థాయికి చేరుకుంటే చైనాలో గ్యాస్‌ ఆధారిత విద్యుత్‌ ఉత్పత్తి కేంద్రాల నుంచి డిమాండ్‌ మళ్లీ పెరుగుతుందని చెప్పారు.
చైనాలో ఎల్‌ఎన్‌జీ దిగుమతులు తగ్గినప్పటికీ విద్యుత్‌ వినియోగం మాత్రం బలంగా పెరుగుతోందని ఆయన తెలిపారు. ఎల్‌ఎన్‌జీ ధరలు MMBtuకి 7–9 డాలర్ల సాధారణ స్థాయికి వస్తే డిమాండ్‌ తిరిగి పుంజుకునే అవకాశం ఉందని అంచనా వేశారు.
ప్రస్తుత సంక్షోభ ప్రభావం దీర్ఘకాలం కొనసాగకపోవచ్చని గెయిల్‌ ఎండీ దీపక్‌ గుప్తా ఆశాభావం వ్యక్తం చేశారు. వచ్చే నాలుగైదేళ్లలో 150–200 మిలియన్‌ టన్నుల అదనపు ఎల్‌ఎన్‌జీ సరఫరా మార్కెట్లోకి వచ్చే అవకాశం ఉందని, దీనివల్ల ధరలు క్రమంగా తగ్గే అవకాశముందని తెలిపారు.
ధరలు తగ్గి సరఫరాలు సాధారణ స్థాయికి వస్తే విద్యుత్‌ రంగంతో పాటు వివిధ పరిశ్రమలు మళ్లీ సహజ వాయువు వైపు మళ్లే అవకాశం ఉందని గెయిల్‌ అభిప్రాయపడుతోంది. బొగ్గు, చమురుతో పోలిస్తే తక్కువ ఉద్గారాలు కలిగిన ఇంధనంగా గ్యాస్‌కు ఉన్న ప్రాధాన్యం భవిష్యత్తులో డిమాండ్‌ను పెంచే అంశంగా మారొచ్చని అధికారులు చెబుతున్నారు.
