అర్హులైన జర్నలిస్టులందరికీ ఇంటి స్థలాలు ఇవ్వాలి

సంగారెడ్డి, అక్టోబర్ 27 (నవజ్యోతి ప్రతినిధి): సంగారెడ్డి జిల్లాలో అర్హులైన జర్నలిస్టులందరికీ ఇంటి స్థలాలు మంజూరు చేయాలని టీయూడబ్ల్యూజే–ఐజేయూ జిల్లా శాఖ ప్రభుత్వాన్ని కోరింది. మంగళవారం సంగారెడ్డి జిల్లా పరిషత్ కార్యాలయంలో నిర్వహించిన ఉమ్మడి జిల్లా సమీక్ష సమావేశం అనంతరం సంఘం జిల్లా అధ్యక్షుడు బండారు యాదగిరి ఆధ్వర్యంలో నాయకులు రాష్ట్ర రెవెన్యూ, హౌసింగ్, సమాచార పౌరసంబంధాల శాఖ మంత్రి పొంగులేటి శ్రీనివాస్‌రెడ్డికి వినతిపత్రం అందజేశారు. ఈ సందర్భంగా బండారు యాదగిరి మాట్లాడుతూ ప్రభుత్వం ఇచ్చిన హామీలను అమలు చేసి జర్నలిస్టుల సమస్యలను పరిష్కరించాలని కోరారు. అర్హులైన జర్నలిస్టుల జాబితా రూపొందించి ఇంటి స్థలాలు కేటాయించాలని విజ్ఞప్తి చేశారు. హెల్త్ కార్డులు లేకపోవడంతో వైద్య ఖర్చులు భరించలేక జర్నలిస్టుల కుటుంబాలు ఆర్థిక ఇబ్బందులు ఎదుర్కొంటున్నాయని ఆవేదన వ్యక్తం చేశారు. జర్నలిస్టులు, వారి కుటుంబాలకు నగదురహిత వైద్యసేవలు అందించాలని డిమాండ్ చేశారు. పెండింగ్‌లో ఉన్న అక్రిడిటేషన్ కార్డులను వెంటనే మంజూరు చేయాలని కోరారు. దీనిపై మంత్రి పొంగులేటి సానుకూలంగా స్పందిస్తూ ముందుగా హైదరాబాద్ జర్నలిస్టులకు, అనంతరం సంగారెడ్డి జిల్లాలో అర్హులైన వారికి ఇంటి స్థలాలు కేటాయిస్తామని హామీ ఇచ్చారు. మంత్రి దామోదర రాజనర్సింహ సైతం జర్నలిస్టుల సమస్యలను వివరించి పరిష్కారానికి సహకరిస్తామని తెలిపారు. సమావేశంలో నారాయణఖేడ్ ఎమ్మెల్యే సంజీవరెడ్డి, కలెక్టర్ ప్రతీక్ జైన్ పాల్గొన్నారు. సంఘ నాయకులు రాజు నాయక్, హెచ్ఎంటీవీ శ్రీనివాస్, బాలయ్య, శ్రీకాంత్, ఫొటో జర్నలిస్టుల సంఘం అధ్యక్షుడు ఆరిఫ్ తదితరులు పాల్గొన్నారు. జర్నలిస్టుల సంక్షేమానికి ప్రభుత్వం తక్షణ చర్యలు చేపట్టాలని సంఘం ప్రతినిధులు విజ్ఞప్తి చేశారు.