పట్టపగలే వెలుగుతున్న వీధి దీపాలు!

తూప్రాన్‌, అక్టోబర్‌ 30 (నవజ్యోతి ప్రతినిధి నవీన్‌):

ఒకవైపు ఎల్‌నినో ప్రభావంతో ఎండల తీవ్రత, విద్యుత్‌ వినియోగం పెరుగుతుండగా.. మరోవైపు తూప్రాన్‌ పట్టణంలోని 5వ వార్డులో వీధి దీపాలు పట్టపగలే వెలుగుతూ విద్యుత్‌ను వృథా చేస్తున్నాయి. విద్యుత్‌ను పొదుపుగా వినియోగించుకోవాలని అధికారులు సూచిస్తున్నా, క్షేత్రస్థాయిలో మాత్రం పరిస్థితి అందుకు భిన్నంగా కనిపిస్తోంది. రాత్రి మాత్రమే వెలగాల్సిన వీధి దీపాలు పగలు కూడా ఆన్‌లో ఉండటంపై స్థానికులు అసహనం వ్యక్తం చేస్తున్నారు. సంబంధిత వార్డు కౌన్సిలర్‌, మున్సిపల్‌ అధికారులు ఈ సమస్యను పట్టించుకోవడం లేదని ఆగ్రహం వ్యక్తం చేస్తున్నారు.

విద్యుత్‌ పొదుపు మాటలకే పరిమితమా?

విద్యుత్‌ వినియోగాన్ని తగ్గించుకోవాలని ఒకవైపు అధికారులు అవగాహన కల్పిస్తుంటే, మరోవైపు మున్సిపాలిటీలో పగటిపూట వీధి దీపాలు వెలుగుతుండటం విమర్శలకు తావిస్తోంది. ఎల్‌నినో ప్రభావంతో విద్యుత్‌ అవసరాలు పెరుగుతున్న సమయంలో ఇలాంటి వృథాను అరికట్టాల్సిన బాధ్యత అధికారులపై ఉందని ప్రజలు పేర్కొంటున్నారు. వీధి దీపాల నిర్వహణను పర్యవేక్షించాల్సిన వార్డు ప్రజాప్రతినిధి, మున్సిపల్‌ సిబ్బంది స్పందించకపోవడంపై ప్రశ్నలు లేవనెత్తుతున్నారు.

ఇప్పటికైనా స్పందించాలి

విద్యుత్‌ వృథాను అరికట్టేందుకు సంబంధిత వార్డు కౌన్సిలర్‌, మున్సిపల్‌ కమిషనర్‌ తక్షణమే స్పందించాలని స్థానికులు కోరుతున్నారు. 5వ వార్డులో వీధి దీపాల నిర్వహణను పరిశీలించి, పగటిపూట వెలుగుతున్న లైట్లను నిలిపివేయాలని విజ్ఞప్తి చేస్తున్నారు. విద్యుత్‌ పొదుపు ప్రచారం కేవలం మాటలకే పరిమితం కాకుండా ఆచరణలోనూ కనిపించాలని పట్టణ ప్రజలు డిమాండ్‌ చేస్తున్నారు.