ఏసీబీ కేసులకు అనుమతుల అడ్డంకులు!

హైదరాబాద్, అక్టోబర్ 22 (నవజ్యోతి ప్రతినిధి): అవినీతి నిరోధక శాఖ (ఏసీబీ) లంచం తీసుకుంటూ పట్టుబడిన అధికారులపై కేసులు నమోదు చేస్తున్నప్పటికీ, తదుపరి ప్రాసిక్యూషన్ అనుమతుల విషయంలో ప్రభుత్వ శాఖల్లో జరుగుతున్న జాప్యం కేసుల పురోగతిని దెబ్బతీస్తోందని హైదరాబాద్‌కు చెందిన ఫోరం ఫర్ గుడ్ గవర్నెన్స్ ఆందోళన వ్యక్తం చేసింది. ఏసీబీ ప్రతి నెలా సగటున 20 నుంచి 25 కేసులు నమోదు చేస్తోందని, అయితే నిందితులపై న్యాయపరమైన చర్యలకు అనుమతి కోరుతూ పంపిన నివేదికలపై నిర్ణయాలు తీసుకోవడంలో జాప్యం జరుగుతోందని సంస్థ పేర్కొంది.

22 కేసుల్లో ప్రాసిక్యూషన్‌కు అనుమతి నిరాకరణ?

గత రెండేళ్లలో ఏసీబీ అనుమతి కోరిన 22 కేసుల్లో ప్రాసిక్యూషన్‌కు అనుమతి నిరాకరించి, కేసులను ఉపసంహరించుకోవాలని ఆదేశించినట్లు ఫోరం ఫర్ గుడ్ గవర్నెన్స్ వెల్లడించింది.

లంచం తీసుకుంటూ పట్టుబడినా చర్యల్లో జాప్యం

లంచం తీసుకుంటూ రెడ్‌హ్యాండెడ్‌గా పట్టుబడిన స్పష్టమైన కేసులను సైతం ఏళ్ల తరబడి పెండింగ్‌లో ఉంచి, చివరకు శాఖాపరమైన విచారణలకు పంపుతున్నారని ఫోరం ఆరోపించింది. దీనివల్ల కోర్టుల్లో ప్రాసిక్యూషన్ కొనసాగించలేని పరిస్థితులు ఏర్పడుతున్నాయని తెలిపింది. ప్రభుత్వ సచివాలయంలోని కొందరు అధికారులు అవినీతి ఆరోపణలు ఎదుర్కొంటున్న వారిని కాపాడే విధంగా వ్యవహరిస్తున్నారనే అభిప్రాయం కలుగుతోందని ఫోరం వ్యవస్థాపకుడు ఎం. పద్మనాభ రెడ్డి పేర్కొన్నారు. కొందరు అధికారులు ఒకటి కంటే ఎక్కువసార్లు ఏసీబీ కేసుల్లో చిక్కిన సందర్భాలు కూడా ఉన్నాయని తెలిపారు.

సుప్రీంకోర్టు తీర్పును ప్రస్తావించిన సంస్థ

అవినీతి నిరోధక చట్టంలోని సెక్షన్‌ 17ఏపై అక్టోబర్ 16న సుప్రీంకోర్టు చేసిన వ్యాఖ్యలను ఫోరం తన విజ్ఞప్తిలో ప్రస్తావించింది. ప్రభుత్వ ఉద్యోగులు తమ అధికారిక విధుల్లో భాగంగా నిజాయితీతో తీసుకున్న నిర్ణయాలు లేదా చేసిన సిఫారసుల విషయంలో దురుద్దేశపూర్వక కేసుల నుంచి రక్షణ కల్పించడమే ఈ నిబంధన ఉద్దేశమని కోర్టు స్పష్టం చేసినట్లు తెలిపింది. లంచం డిమాండ్ చేయడం లేదా స్వీకరించడం అధికారిక విధిలో భాగం కాదని, లంచం తీసుకుంటూ పట్టుబడిన ప్రభుత్వ ఉద్యోగిపై దర్యాప్తు చేపట్టేందుకు సెక్షన్‌ 17ఏ కింద ముందస్తు అనుమతి అవసరం లేదని తీర్పు పేర్కొన్నట్లు ఫోరం వివరించింది.

ప్రభుత్వ ప్రధాన కార్యదర్శికి వినతి

ఏసీబీ నమోదు చేసిన ట్రాప్ కేసుల్లో సెక్షన్‌ 17ఏ కింద ముందస్తు అనుమతి కోసం పట్టుబట్టకుండా, నిందితులపై ప్రాసిక్యూషన్ కొనసాగించేలా ఏసీబీకి తగిన ఆదేశాలు జారీ చేయాలని ఫోరం ఫర్ గుడ్ గవర్నెన్స్ ప్రభుత్వ ప్రధాన కార్యదర్శిని కోరింది. అవినీతి కేసుల్లో దర్యాప్తు, న్యాయపరమైన చర్యలకు ఆటంకాలు లేకుండా చూడాలని, ఏసీబీ చర్యలకు అనుగుణంగా ప్రభుత్వం సకాలంలో నిర్ణయాలు తీసుకోవాలని విజ్ఞప్తి చేసింది.