ఐఐటీల్లో ప్లేస్మెంట్, ఇంటర్న్షిప్ మార్గదర్శకాలకు సమన్వయ సంస్థగా పనిచేసే AIPC.. సెప్టెంబర్ మొదటి వారంలో ఐఐటీ గువాహటిలో సమావేశమైంది. సెప్టెంబర్ 30లోగా సంబంధిత కంపెనీలకు ఈ నిర్ణయాన్ని తెలియజేయనుంది. దీనిని ‘బ్లాక్లిస్ట్’గా పేర్కొనకుండా ‘నాన్-కోఆపరేషన్’గా వ్యవహరించాలని కమిటీ నిర్ణయించింది.
2026లో గ్రాడ్యుయేషన్ పూర్తి చేసిన విద్యార్థులకు ఇచ్చిన ఆఫర్లలో 150కిపైగా ఆఫర్లు అమలు కాలేదని AIPC కన్వీనర్, ఐఐటీ గువాహటి అసోసియేట్ ప్రొఫెసర్ జాన్ జోస్ తెలిపారు. ఈ వ్యవహారాలు 23 ఐఐటీలకు సంబంధించినవని, కొన్ని కంపెనీలు 10-15 వరకు ఆఫర్లను ఉపసంహరించుకున్నాయని ఆయన వెల్లడించారు.
క్యాంపస్ వర్గాల సమాచారం ప్రకారం ఒరాకిల్ సంస్థకు సంబంధించిన సుమారు 40 ఉద్యోగ ఆఫర్లు అమలు కాలేదని తెలుస్తోంది. దీంతో రెండేళ్లపాటు నాన్-కోఆపరేషన్ ఎదుర్కొనే కంపెనీల జాబితాలో ఒరాకిల్ కూడా ఉన్నట్లు సమాచారం. అయితే AIPC తుది జాబితాను ఇంకా ఖరారు చేయలేదు. ఆయా ఐఐటీల నుంచి తాజా వివరాలు అందిన తర్వాత ప్రభావితమైన ఆఫర్ల సంఖ్యను కమిటీ తేల్చనుంది. పలు స్టార్టప్లు కూడా ఈ జాబితాలో ఉన్నట్లు తెలుస్తోంది.
విద్యార్థులను ఉద్యోగాల్లోకి తీసుకోవడానికి కంపెనీలకు AIPC సెప్టెంబర్ 15 వరకు గడువు ఇచ్చింది. గత ఏడాది ఆఫర్లను అమలు చేయని 10-11 కంపెనీలకు ఆయా ఐఐటీలు వ్యక్తిగతంగా లేఖలు రాశాయి. ఈసారి మాత్రం అన్ని ఐఐటీల తరఫున AIPC ఒకే నిర్ణయంతో కంపెనీలకు సమాచారం ఇవ్వనుంది.
ఆఫర్లు కోల్పోయిన విద్యార్థులపై ప్రభావాన్ని తగ్గించేందుకు ఐఐటీ ప్లేస్మెంట్ విభాగాలు చర్యలు చేపట్టాయి. ప్రభావిత విద్యార్థుల బయోడేటాలను ఇప్పటికే తమ వద్ద ఉన్న ఇతర రిక్రూటర్లకు పంపించి, ఖాళీగా ఉన్న ఉద్యోగాలకు వారిని పరిగణనలోకి తీసుకోవాలని కోరాయి. ఈ విధంగా రిఫర్ చేసిన విద్యార్థుల్లో సుమారు 20-30 శాతం మందికి ప్రత్యామ్నాయ ఉద్యోగాలు లభించినట్లు జాన్ జోస్ తెలిపారు.
అయితే ఉద్యోగాలు కోల్పోయిన విద్యార్థుల్లో ఇంకా ఎంతమంది ఉద్యోగాల కోసం ఎదురుచూస్తున్నారన్న దానిపై ఐఐటీల వద్ద పూర్తి సమాచారం లేదని ఆయన పేర్కొన్నారు. కొందరు విద్యార్థులు ఆఫ్-క్యాంపస్ నియామకాలు లేదా వ్యక్తిగత పరిచయాల ద్వారా ఉద్యోగాలు పొందే అవకాశం ఉండటంతో వారి వివరాలు సంస్థలకు తెలియకపోవచ్చని వివరించారు.
క్యాంపస్ ప్లేస్మెంట్ ద్వారా ఒక కంపెనీ ఇచ్చిన ఉద్యోగ ఆఫర్పై విద్యార్థులు ఆధారపడే పరిస్థితిని దృష్టిలో ఉంచుకుని ఈ నిర్ణయం తీసుకున్నట్లు AIPC తెలిపింది. విద్యార్థులకు జరిగిన నష్టాన్ని తగ్గించడంతో పాటు ఐఐటీ ప్లేస్మెంట్ వ్యవస్థపై కంపెనీలు, విద్యార్థుల్లో ఉన్న విశ్వసనీయతను కాపాడటమే లక్ష్యంగా ఈ చర్యను చూస్తున్నారు. ఇదే సమయంలో టెక్నాలజీ రంగంలో నియామకాలు కొంత మందగించిన పరిస్థితుల్లో కొత్త ప్లేస్మెంట్ సీజన్ ప్రారంభం కానుండటం ప్రాధాన్యం సంతరించుకుంది.
