‘అనలాగ్ పనీర్’పై నిషేధం?తయారీ – విక్రయాలను అడ్డుకునేందుకు ఎఫ్ఎస్ఎస్ఏఐ ప్రతిపాదన!
న్యూఢిల్లీ, సెప్టెంబర్ 26 (నవజ్యోతి ప్రతినిధి): ఆహార కల్తీ, వినియోగదారులను తప్పుదోవ పట్టించే లేబులింగ్పై కఠిన చర్యలకు సిద్ధమవుతున్న భారత ఆహార భద్రత, ప్రమాణాల ప్రాధికార సంస్థ (ఎఫ్ఎస్ఎస్ఏఐ) మరో కీలక ప్రతిపాదన చేసింది. పాలతో తయారైన పనీర్కు బదులుగా పాలేతర పదార్థాలతో తయారు చేసే ‘అనలాగ్ ప్రొడక్ట్ యాజ్ పనీర్’ తయారీ, విక్రయాలను నిషేధించే దిశగా ముసాయిదా నిబంధనలను ప్రతిపాదించింది.
ఎఫ్ఎస్ఎస్ఏఐ జారీ చేసిన ఫుడ్ సేఫ్టీ అండ్ స్టాండర్డ్స్ (ప్రొహిబిషన్ అండ్ రెస్ట్రిక్షన్స్ ఆన్ సేల్స్) అమెండ్మెంట్ రెగ్యులేషన్స్-2026 ముసాయిదాలో ఈ ప్రతిపాదనను పొందుపరిచింది. పాల ఉత్పత్తిగా కనిపించేలా, రుచిగా లేదా వినియోగంలో పనీర్కు ప్రత్యామ్నాయంగా ఉండేలా.. పాల నుంచి ఉత్పన్నం కాని పదార్థాలతో తయారు చేసే ఉత్పత్తులను ‘పనీర్’ పేరుతో విక్రయించకుండా చర్యలు తీసుకోవడమే లక్ష్యమని ఎఫ్ఎస్ఎస్ఏఐ తెలిపింది.
పాల ఉత్పత్తి కాకపోయినా.. పాలు లేదా పాల ఉత్పత్తుల మాదిరిగా కనిపించే, రుచి లేదా వినియోగ లక్షణాలు కలిగిన ఆహారాన్ని డెయిరీ సందర్భంలో ‘అనలాగ్’గా పరిగణిస్తారు. ఇందులో అసలు పాల పదార్థాల్లో కొన్నింటిని లేదా పూర్తిగా ఇతర పాలేతర పదార్థాలతో భర్తీ చేస్తారు. అందువల్ల ఇలాంటి ఉత్పత్తిని నిజమైన పాల పనీర్గా వినియోగదారులు భావించే అవకాశం ఉందన్న ఆందోళనతో నియంత్రణ చర్యలకు ఎఫ్ఎస్ఎస్ఏఐ ప్రతిపాదన చేసింది.
ఇప్పటికే ‘అనలాగ్ ఇన్ డెయిరీ కాంటెక్స్ట్’ కేటగిరీలో లైసెన్స్ లేదా రిజిస్ట్రేషన్ పొందిన ఉత్పత్తులు ఇకపై తమ పేర్లు, లేబుల్స్, మార్కెటింగ్లో ‘పనీర్’ అనే పదాన్ని ఉపయోగించడాన్ని నిలిపివేయాల్సి ఉంటుందని ముసాయిదా పేర్కొంది.
ముసాయిదా నిబంధనలపై ఆహార వ్యాపార సంస్థలు, పరిశ్రమలు, ఇతర భాగస్వాముల నుంచి అభ్యంతరాలు, సూచనలు స్వీకరించేందుకు ఎఫ్ఎస్ఎస్ఏఐ 60 రోజుల గడువు ఇచ్చింది. ఈ ప్రక్రియ పూర్తయిన అనంతరం తుది నిబంధనలపై నిర్ణయం తీసుకునే అవకాశం ఉంది. ప్రస్తుతం ఇది ముసాయిదా ప్రతిపాదన మాత్రమే కావడంతో తుది నిబంధనలు అమల్లోకి వచ్చే వరకు దీనిని పూర్తి స్థాయి నిషేధంగా పరిగణించరాదు.
దేశంలోని పలు రాష్ట్రాలు ఇప్పటికే అనలాగ్ పనీర్ తయారీ, విక్రయాలపై నిషేధాలు విధించాయి. ఇప్పుడు దేశవ్యాప్తంగా ఒకే విధమైన నియంత్రణ తీసుకురావాలనే దిశగా ఎఫ్ఎస్ఎస్ఏఐ ప్రతిపాదన చేయడం ప్రాధాన్యం సంతరించుకుంది.
గత ఆరు నెలలుగా తప్పుదోవ పట్టించే ప్రకటనలు, లేబులింగ్, పరిశుభ్రత ప్రమాణాల ఉల్లంఘనలపై ఎఫ్ఎస్ఎస్ఏఐ తనిఖీలను ముమ్మరం చేసింది. ఆహార వ్యాపార సంస్థలతో పాటు ఈ-కామర్స్ వేదికలపైనా చర్యలు తీసుకుంటోంది. ఇటీవల అమెజాన్, స్విగ్గీ ఇన్స్టామార్ట్, బిగ్బాస్కెట్, ఫ్లిప్కార్ట్ ఇండియా, జెప్టో వంటి వేదికలపై వివిధ నిబంధనల ఉల్లంఘనలకు సంబంధించి పెనల్ చర్యలను ప్రారంభించినట్లు ఎఫ్ఎస్ఎస్ఏఐ వెల్లడించింది.
ఎనర్జీ డ్రింక్ తయారీ సంస్థలు, మద్యపాన ఉత్పత్తుల సంస్థలపైనా నియంత్రణ చర్యలను చేపడుతున్నట్లు తెలిపింది. వినియోగదారులను ఉత్పత్తి స్వభావం, పదార్థాల విషయంలో తప్పుదోవ పట్టించే అవకాశాలను తగ్గించడం, ఆహార భద్రత ప్రమాణాలను కట్టుదిట్టం చేయడమే ఈ చర్యల ప్రధాన ఉద్దేశంగా ఎఫ్ఎస్ఎస్ఏఐ పేర్కొంది.
‘పనీర్’ పేరుతో మార్కెట్లో లభించే ప్రతి ఉత్పత్తి అనలాగ్ పనీర్ అని భావించాల్సిన అవసరం లేదు. ఉత్పత్తి లేబుల్, పదార్థాల వివరాలు, ఎఫ్ఎస్ఎస్ఏఐ నిబంధనలకు అనుగుణమైన సమాచారం ఆధారంగానే వినియోగదారులు నిర్ణయం తీసుకోవాలి. ముసాయిదా నిబంధనలకు 60 రోజుల అభిప్రాయాల ప్రక్రియ అనంతరం తుది నిర్ణయం వెలువడనుంది.
