5 లక్షలకుపైగా నకిలీ జీమెయిల్ ఖాతాలు!
ప్రభుత్వ కార్యాలయాలకు నకిలీ బాంబు బెదిరింపు మెయిళ్లు పంపేందుకు భారీగా నకిలీ జీమెయిల్ ఖాతాలను సృష్టించిన నేర ముఠాను గుజరాత్ పోలీసులు ఛేదించారు. ఈ వ్యవహారంలో 5,13,847 జీమెయిల్ ఖాతాలు – పాస్వర్డ్లు వెలుగులోకి రావడంతో.. ఖాతాల భద్రతా వ్యవస్థపై గూగుల్ను ప్రశ్నించాలని పోలీసులు నిర్ణయించారు.
సెప్టెంబర్ 10న గుజరాత్ ప్రభుత్వానికి బాంబు బెదిరింపు మెయిల్ రావడంతో ఈ కేసు దర్యాప్తు ప్రారంభమైంది. ఇటీవల ఢిల్లీలో జరిగిన బ్రిక్స్ సదస్సుకు కొద్ది రోజుల ముందు ఈ బెదిరింపు రావడం కలకలం రేపింది.
భారత్తో సహకరిస్తున్న కొన్ని దేశాలను కూడా బెదిరించినట్లు పోలీసులు తెలిపారు. అయితే ఈ బెదిరింపులు నకిలీవేనని దర్యాప్తులో తేలింది.
గుజరాత్ పోలీసులు ఈ వ్యవహారంలో ఇద్దరిని అరెస్ట్ చేశారు. 2022 నుంచి ఉపయోగిస్తున్న 5,13,847 జీమెయిల్ ఐడీలు – పాస్వర్డ్లు తమ దర్యాప్తులో బయటపడ్డాయని పోలీసులు తెలిపారు.
ఇంత భారీ స్థాయిలో నకిలీ జీమెయిల్ ఖాతాలు ఉపయోగించడం తమ దర్యాప్తులో అపూర్వమైన విషయమని గుజరాత్ సైబర్క్రైమ్ అధికారి వివేక్ భేదా తెలిపారు.
నకిలీ ఖాతాలను ఇంత భారీ స్థాయిలో సృష్టించి నిర్వహించగలిగిన విధానంపై గూగుల్ను ప్రశ్నించాలని పోలీసులు భావిస్తున్నారు. భద్రతా నిబంధనలను ఎలా అధిగమించగలిగారు? అనే అంశంపైనా దర్యాప్తు చేస్తున్నారు.
ప్రతి నకిలీ ఖాతాకు గూగుల్ అందించే టూ-ఫ్యాక్టర్ ఆథెంటికేషన్ కూడా ఉపయోగించినట్లు పోలీసులు గుర్తించారు. ఇంత పెద్ద సంఖ్యలో ఖాతాలకు ఈ అదనపు భద్రతా విధానం ఎలా అమలైందన్నది మరో కీలక దర్యాప్తు అంశంగా మారింది.
అరెస్టయిన వారిలో ఒకరు బంగ్లాదేశ్లోని కొనుగోలుదారుడితో సంప్రదింపులు జరిపినట్లు పోలీసులు తెలిపారు. నకిలీ ఖాతాలను బ్యాచ్లుగా విక్రయించి.. కొంత చెల్లింపును క్రిప్టోకరెన్సీ రూపంలో స్వీకరించినట్లు దర్యాప్తులో గుర్తించినట్లు చెప్పారు.
ఆన్లైన్ మోసాల్లో గూగుల్కు చెందిన ఫైర్బేస్ ప్లాట్ఫామ్ దుర్వినియోగంపై కూడా భారత అధికారులు ఇప్పటికే పరిశీలన చేస్తున్నారు. ఈ నేపథ్యంలో తాజా బాంబు బెదిరింపుల వ్యవహారంలో గూగుల్ భద్రతా వ్యవస్థపై పోలీసుల ప్రశ్నలు మరింత ప్రాధాన్యం సంతరించుకున్నాయి.
నకిలీ ఖాతాల సృష్టి – వినియోగం వెనుక ఉన్న నెట్వర్క్, ఖాతాలను కొనుగోలు చేసిన వ్యక్తులు, బాంబు బెదిరింపులకు వాటిని ఎలా ఉపయోగించారన్న అంశాలపై పోలీసులు దర్యాప్తు చేస్తున్నారు. గూగుల్పై ఎలాంటి చట్టపరమైన చర్యలు లేదా జరిమానాలు ఉంటాయన్నది ప్రస్తుతానికి స్పష్టంగా లేదు.
