దక్షిణ మధ్య రైల్వేలో ‘కవచ్‌ 4.0’!

రైల్వే భద్రతలో మరో కీలక ముందడుగు పడింది. దక్షిణ మధ్య రైల్వేలో తొలిసారిగా అధునాతన ‘కవచ్‌ 4.0’ వ్యవస్థ అందుబాటులోకి వచ్చింది. హైదరాబాద్‌ డివిజన్‌లోని మల్కాజ్‌గిరి–కామారెడ్డి సెక్షన్‌లో 108 రూట్‌ కిలోమీటర్ల మేర ఇప్పటికే ఉన్న కవచ్‌ 3.2 వ్యవస్థను 4.0 వెర్షన్‌కు అప్‌గ్రేడ్‌ చేశారు.

రైల్వే మంత్రిత్వ శాఖ వివరాల ప్రకారం.. కవచ్‌ 4.0లో అధునాతన సాంకేతికతతో పాటు వ్యవస్థ విశ్వసనీయతను పెంచే పలు మార్పులు చేశారు. రైళ్లను మరింత సురక్షితంగా నడిపేందుకు అవసరమైన సాంకేతిక సామర్థ్యాలను ఇందులో జోడించారు. దక్షిణ మధ్య రైల్వే పరిధిలో ఇప్పటికే 1,465 కిలోమీటర్లకు పైగా కవచ్‌ 3.2ను అమలు చేసిన అనుభవాన్ని ఆధారంగా తీసుకుని తాజా వెర్షన్‌ను విస్తరించారు.

సిగ్నల్‌ను పట్టించుకోకుండా రైలు ముందుకు వెళ్లే సిగ్నల్‌ పాసింగ్‌ ఎట్‌ డేంజర్‌ (ఎస్‌పీఏడీ) ఘటనలను నివారించడంలో కవచ్‌ కీలకంగా పనిచేస్తుంది. అవసరమైన సందర్భాల్లో రైలు వేగాన్ని నియంత్రించడం ద్వారా ఢీకొనే ప్రమాదాన్ని తగ్గించేందుకు ఈ వ్యవస్థ సహాయపడుతుంది.

ప్రతికూల వాతావరణ పరిస్థితుల్లోనూ రైళ్ల సురక్షిత నిర్వహణకు కవచ్‌ వ్యవస్థ తోడ్పడుతుందని రైల్వే శాఖ తెలిపింది. దక్షిణ మధ్య రైల్వేలో కవచ్‌ 4.0ను తొలిసారిగా అమలు చేయడం ద్వారా స్వదేశీ రైల్వే భద్రతా సాంకేతికతను మరింత విస్తరించే దిశగా కీలక అడుగు పడినట్లు పేర్కొంది.