వికసిత్ భారత్ 2047కు విద్యుత్ వాహనాలే కీలకం!
వికసిత్ భారత్ 2047 లక్ష్య సాధనలో విద్యుత్ మొబిలిటీ వ్యూహాత్మక అవసరం అని నీతి ఆయోగ్ సభ్యుడు రాజీవ్ గౌబా పేర్కొన్నారు. ప్రపంచవ్యాప్తంగా స్వచ్ఛమైన రవాణా వైపు మార్పు ఇప్పటికే ప్రారంభమైందని – భారత్కు ఇది ఆర్థికంగా – పర్యావరణపరంగా కీలకమని తెలిపారు.
2025లో కొత్త కార్ల విక్రయాల్లో అమెరికాలో విద్యుత్ కార్ల వాటా సుమారు 10 శాతంగా ఉంది. యూరోపియన్ యూనియన్లో ఇది 25 శాతానికి పైగా ఉండగా – చైనాలో 50 శాతాన్ని దాటింది. రానున్న కాలంలో ఈ వాటా మరింత పెరిగే అవకాశముందని గౌబా తెలిపారు.
భారత్ ప్రస్తుతం తన ముడిచమురు అవసరాల్లో దాదాపు 89 శాతం విదేశీ సరఫరాలపైనే ఆధారపడుతోంది. దేశంలో వాహనాల సంఖ్య పెరుగుతున్న నేపథ్యంలో విద్యుత్ వాహనాల వినియోగం విస్తరించకపోతే దిగుమతి ఆధారితత మరింత పెరిగే అవకాశం ఉందని నీతి ఆయోగ్ పేర్కొంది.
భారత ఆర్థిక వ్యవస్థలో ఆటోమొబైల్ రంగం సుమారు 7.1 శాతం జీడీపీకి దోహదం చేస్తోంది. దాదాపు 1.9 కోట్ల ఉద్యోగాలకు ఈ రంగం ఆధారంగా ఉంది. ప్రపంచ విద్యుత్ మొబిలిటీ మార్పులకు అనుగుణంగా భారత ఆటో పరిశ్రమ ముందుకు సాగాల్సిన అవసరం ఉందని గౌబా తెలిపారు.
ఎలక్ట్రిక్ వాహనాల రంగానికి ఇప్పటికే రూ.92,000 కోట్లకుపైగా ఆర్థిక సహాయం అందించినట్లు గౌబా తెలిపారు. ఇందులో ఫేమ్ – పీఎం ఈ-డ్రైవ్ – పీఎం ఈ-బస్ సేవ వంటి కార్యక్రమాలు ఉన్నాయి. ఆటోమొబైల్స్ – ఆటో కాంపొనెంట్స్ – అధునాతన బ్యాటరీ తయారీకి ఉత్పత్తి ఆధారిత ప్రోత్సాహక పథకాలు కూడా అమలులో ఉన్నాయని చెప్పారు.
ప్రభుత్వ రంగ చమురు సంస్థలు – ప్రైవేటు సంస్థల ద్వారా ఈవీ ఛార్జింగ్ మౌలిక వసతులు విస్తరిస్తున్నాయని గౌబా తెలిపారు. తాజాగా ప్రారంభించిన యూనిఫైడ్ భారత్ ఈ-చార్జ్ యాప్ ద్వారా ప్రజలకు ఛార్జింగ్ కేంద్రాల వినియోగం మరింత సులభతరం కానుందని పేర్కొన్నారు.
దేశంలోని 36 రాష్ట్రాలు – కేంద్ర పాలిత ప్రాంతాల్లో 29 ఇప్పటికే ప్రత్యేక విద్యుత్ వాహన విధానాలను ప్రకటించాయి. ఇండియా ఎలక్ట్రిక్ మొబిలిటీ ఇండెక్స్ ప్రకారం అత్యధిక రాష్ట్ర స్కోరు గత ఏడాదిలో 77 నుంచి 84కి పెరిగింది. మధ్యస్థ స్కోరు 36 నుంచి 40కి చేరింది.
రాష్ట్రాలు తమ ప్రాంతీయ అవసరాలకు అనుగుణంగా విద్యుత్ మొబిలిటీ విధానాలను అమలు చేస్తున్నాయని గౌబా తెలిపారు. పట్టణ ప్రజా రవాణాను విద్యుదీకరించడం – నమ్మకమైన ఛార్జింగ్ నెట్వర్క్ ఏర్పాటు – స్థానిక పరిశోధన – ఆవిష్కరణలకు పెట్టుబడులు పెంచాలని రాష్ట్రాలకు సూచించారు.
ఇటీవలి పశ్చిమాసియా సంక్షోభం విద్యుత్ మొబిలిటీ మార్పును మరింత వేగవంతం చేసే అంశంగా మారవచ్చని గౌబా అభిప్రాయపడ్డారు. 1970ల చమురు సంక్షోభాల మాదిరిగానే ప్రస్తుత భౌగోళిక రాజకీయ పరిణామాలు ఇంధన సామర్థ్యం – ప్రత్యామ్నాయ రవాణా వనరులపై దృష్టిని పెంచవచ్చని తెలిపారు.
