సూరారం లింగం చెరువులో గ్రౌండ్ పరిస్థితులపై సీపీ ఆరా!
గణేశ్ నిమజ్జనం వేళ ఎలాంటి అవాంఛనీయ ఘటనలకు తావులేకుండా – భక్తుల రాకపోకలు సాఫీగా సాగేలా అధికార యంత్రాంగం ఏర్పాట్లను ముమ్మరం చేసింది. ఇందులో భాగంగా సూరారం కట్ట మైసమ్మ లింగం చెరువు – బేబీ పాండు ప్రాంతాలను సైబరాబాద్ పోలీస్ కమిషనర్ రమేష్ క్షేత్రస్థాయిలో పరిశీలించారు. సీఎంసీ కమిషనర్ డాక్టర్ సృజనతో కలిసి నిమజ్జన ఏర్పాట్లపై ఆరా తీశారు.
నిమజ్జన ప్రాంతంలో ట్రాఫిక్ నియంత్రణ – పోలీస్ బందోబస్తు – భక్తుల రాకపోకలు – లైటింగ్ – వైద్య సదుపాయాలు – పారిశుధ్యం – క్రేన్లు – నీటి వసతి వంటి అంశాలను అధికారులు పరిశీలించారు. నిమజ్జన సమయంలో చిన్న లోటుపాట్లు కూడా ఇబ్బందులకు దారితీయకుండా ముందస్తు చర్యలు తీసుకోవాలని సీపీ సూచించారు.
చెరువు పరిసరాల్లో శానిటేషన్ ఏర్పాట్లను కూడా అధికారులు పరిశీలించారు. భక్తులు అధిక సంఖ్యలో వచ్చే నేపథ్యంలో పరిసరాలను పరిశుభ్రంగా ఉంచడంతో పాటు అవసరమైన సదుపాయాలు అందుబాటులో ఉండేలా చర్యలు చేపట్టాలని సూచించారు.
గణేశ్ నిమజ్జనం నిర్వహణలో పోలీస్ – ట్రాఫిక్ – సీఎంసీ – వైద్య – పారిశుధ్య విభాగాలు సమన్వయంతో పనిచేయాల్సిన అవసరాన్ని అధికారులు గుర్తించారు. భక్తులకు ఎలాంటి ఇబ్బందులు తలెత్తకుండా అన్ని విభాగాలు సమన్వయంతో పనిచేస్తున్నట్లు తెలిపారు.
ఈ పరిశీలనలో కుత్బుల్లాపూర్ జోన్ డీసీపీ కోటిరెడ్డి – ట్రాఫిక్ డీసీపీ – సీఎంసీ జోనల్ కమిషనర్ పింకేష్ కుమార్ – అదనపు డీసీపీ పురుషోత్తం – ఏసీపీ బాలగంగి రెడ్డితో పాటు వివిధ శాఖల అధికారులు పాల్గొన్నారు.
