గండిపేట లో చెడ్డీ గ్యాంగ్‌ కలకలం.. అపార్ట్‌మెంట్‌లోకి ఆరుగురు!

గండిపేట మండలం నెక్నాంపూర్‌లో అనుమానిత దొంగల సంచారం కలకలం రేపుతోంది. మణికొండ పరిధిలోని నెక్నాంపూర్‌లో ఆదివారం తెల్లవారుజామున సుమారు ఆరుగురు అనుమానితులు ఫ్లోటిల్లా అపార్ట్‌మెంట్స్‌లోకి ప్రవేశించినట్లు స్థానికులు తెలిపారు. సరస్సు వైపు ఉన్న ఫెన్సింగ్‌ను కట్‌ చేసి అపార్ట్‌మెంట్‌ ప్రాంగణంలోకి వచ్చినట్లు అనుమానిస్తున్నారు.

అనంతరం సీ బ్లాక్‌ మెట్ల మార్గం ద్వారా ఓ ఫ్లాట్‌లోకి ప్రవేశించిన అనుమానితులు అక్కడి నుంచి విలువైన వస్తువులు తీసుకెళ్లినట్లు సమాచారం. ఈ క్రమంలో వారిని ఓ నివాసి అడ్డుకునేందుకు ప్రయత్నించగా.. అతడిని బెదిరించి, ఆయుధాలతో దాడికి ప్రయత్నించినట్లు స్థానికులు చెబుతున్నారు. అనంతరం అనుమానితులు అక్కడి నుంచి పరారైనట్లు తెలిపారు.

ఘటనపై సమాచారం అందుకున్న నార్సింగి పోలీసులు దర్యాప్తు చేపట్టారు. అపార్ట్‌మెంట్‌ పరిసరాలు, ప్రవేశ మార్గాల్లోని సీసీ కెమెరాల దృశ్యాలను పరిశీలిస్తూ అనుమానితుల కదలికలను గుర్తించే ప్రయత్నం చేస్తున్నారు. ఘటనలో చోరీకి గురైన వస్తువుల వివరాలను కూడా పోలీసులు సేకరిస్తున్నట్లు సమాచారం.

నెక్నాంపూర్‌తో పాటు అల్కాపూర్‌ టౌన్‌షిప్‌ ప్రాంతాల్లో రాత్రి వేళల్లో గస్తీ పెంచాలని స్థానికులు పోలీసులను కోరుతున్నారు. అనుమానాస్పద వ్యక్తులు లేదా కదలికలు కనిపిస్తే వెంటనే పోలీసులకు సమాచారం ఇవ్వాలని అధికారులు సూచిస్తున్నారు.