డబిల్‌పూర్ రైల్వే స్టేషన్‌ వద్ద గుర్తుతెలియని మృతదేహం!

మేడ్చల్, సెప్టెంబర్‌ 22 (నవజ్యోతి ప్రతినిధి): ఎల్లంపేట మున్సిపాలిటీ పరిధిలోని డబిల్‌పూర్ రైల్వే స్టేషన్‌ సమీపంలో విషాద ఘటన చోటుచేసుకుంది. రైలు పట్టాల మధ్య గుర్తుతెలియని వ్యక్తి మృతదేహం లభించడంతో స్థానికంగా కలకలం రేగింది.

మృతదేహానికి సమీపంలో AP 23 AJ 8499 నంబర్‌ గల ద్విచక్ర వాహనం పడి ఉండటాన్ని గుర్తించారు. ఈ ఘటనపై సమాచారం అందుకున్న రైల్వే పోలీసులు వెంటనే సంఘటనా స్థలానికి చేరుకుని పరిస్థితిని పరిశీలించారు.

అనంతరం మృతదేహాన్ని పోస్టుమార్టం నిమిత్తం తరలించేందుకు పోలీసులు అంబులెన్స్‌కు సమాచారం అందించారు. మృతుడు ఎవరు, ద్విచక్ర వాహనం అతనిదేనా, మృతికి అసలు కారణం ఏమిటన్న అంశాలపై పోలీసులు దర్యాప్తు చేపట్టారు.

ఇది రైలు ప్రమాదమా లేక ఇతర కారణాలతో మృతి సంభవించిందా అనే కోణంలోనూ రైల్వే పోలీసులు విచారణ కొనసాగిస్తున్నారు. మృతుడి పూర్తి వివరాలు తెలియాల్సి ఉంది.