ఓవర్‌టేక్‌ ప్రయత్నం.. ప్రాణం తీసిన ప్రమాదం!

ఒక్క క్షణం నిర్లక్ష్యం.. అంతలోనే నిండు ప్రాణం గాలిలో కలిసింది. లారీని ఓవర్‌టేక్‌ చేసే క్రమంలో అదుపుతప్పిన బైక్‌ ప్రమాదానికి గురై ఓ వ్యక్తి లారీ కిందకు వెళ్లి అక్కడికక్కడే మృతి చెందిన ఘటన ప్రగతి నగర్‌లో కలకలం రేపింది. బాచుపల్లి పోలీస్‌స్టేషన్‌ పరిధిలోని త్రీ మంకీస్‌ చౌరస్తా సమీపంలో శనివారం రాత్రి ఈ ప్రమాదం చోటుచేసుకుంది. బైక్‌పై వెనుక కూర్చున్న మరో వ్యక్తికి స్వల్ప గాయాలయ్యాయి.

సమాచారం అందుకున్న బాచుపల్లి ఎస్‌హెచ్‌ఓ దాలినాయుడు సిబ్బందితో కలిసి ఘటనా స్థలానికి చేరుకుని పరిస్థితిని పరిశీలించారు. మృతదేహాన్ని పోస్టుమార్టం నిమిత్తం ఆసుపత్రికి తరలించి కేసు నమోదు చేశారు.

రాత్రివేళ రహదారి భద్రతపై అధికారులు మరింత దృష్టి సారించాల్సిన అవసరం ఉందని స్థానికులు కోరుతున్నారు. అయితే ప్రమాదానికి అసలు కారణాలు పోలీసుల దర్యాప్తులో తేలాల్సి ఉంది.