భారత్ రిఫైనింగ్ రంగంలో పెట్టుబడులు పెట్టేందుకు యునైటెడ్ అరబ్ ఎమిరేట్స్ (యూఏఈ), సౌదీ అరేబియా ఆసక్తి చూపుతున్నాయని కేంద్ర పెట్రోలియం, సహజవాయువు శాఖ మంత్రి హర్దీప్ సింగ్ పురి తెలిపారు. దేశంలో పెరుగుతున్న ఇంధన మార్కెట్, రిఫైనింగ్ సామర్థ్య విస్తరణ నేపథ్యంలో గల్ఫ్ దేశాల నుంచి పెట్టుబడులపై ఆసక్తి వ్యక్తమవుతోందని ఆయన పేర్కొన్నారు.
గురువారం జరిగిన ఓ కార్యక్రమంలో మంత్రి మాట్లాడుతూ.. భారత్లో రిఫైనరీ ఏర్పాటు చేయడానికి భారీ పెట్టుబడి అవసరమని తెలిపారు. అదే సమయంలో పెరుగుతున్న దేశీయ డౌన్స్ట్రీమ్ మార్కెట్లో భాగస్వామ్యం లభించే అవకాశం పెట్టుబడిదారులకు కీలక అంశమని వివరించారు.
రిఫైనింగ్ సామర్థ్యం పెంపు
ప్రస్తుతం భారత్ రిఫైనింగ్ సామర్థ్యం రోజుకు సుమారు 5.4 మిలియన్ బ్యారెళ్లుగా ఉంది. కొత్త రిఫైనరీలు ఏర్పాటు చేయడంతో పాటు ప్రస్తుతం ఉన్న యూనిట్లను అప్గ్రేడ్ చేయడం ద్వారా ఈ సామర్థ్యాన్ని 6.2 నుంచి 6.4 మిలియన్ బ్యారెళ్లకు పెంచాలని ప్రభుత్వం లక్ష్యంగా పెట్టుకున్నట్లు హర్దీప్ సింగ్ పురి తెలిపారు.
ప్రపంచంలో మూడో అతిపెద్ద చమురు దిగుమతిదారు, వినియోగదారుగా ఉన్న భారత్లో ఇంధన డిమాండ్ పెరుగుతున్న నేపథ్యంలో రిఫైనింగ్ సామర్థ్యాన్ని విస్తరించాల్సిన అవసరం ఉందని మంత్రి వివరించారు. దేశీయ అవసరాలను తీర్చడంతో పాటు ఇంధన ఉత్పత్తుల ఎగుమతులకు కూడా రిఫైనింగ్ సామర్థ్యం కీలకంగా మారుతోంది.
ఒక్క రిఫైనరీకే రూ.80 వేల కోట్ల వరకు!
ఒక రిఫైనరీని నిర్మించడానికి సుమారు రూ.78,000 కోట్ల నుంచి రూ.80,000 కోట్ల వరకు భారీ పెట్టుబడి అవసరమవుతుందని మంత్రి తెలిపారు. ఈ స్థాయి మూలధన అవసరం నేపథ్యంలో అంతర్జాతీయ పెట్టుబడిదారుల భాగస్వామ్యం రిఫైనింగ్ విస్తరణకు ప్రాధాన్యం సంతరించుకుంది.
“భారత్లో రిఫైనరీలో పెట్టుబడి పెట్టడానికి ఎవరైనా ముందుకు రావాలంటే.. వేగంగా అభివృద్ధి చెందుతున్న దేశీయ డౌన్స్ట్రీమ్ మార్కెట్లో కూడా వారికి భాగస్వామ్యం ఉండాలి” అని పురి పేర్కొన్నారు. ఈ నేపథ్యంలో యూఏఈ, సౌదీ అరేబియా పెట్టుబడులపై ఆసక్తిగా ఉన్నాయని తెలిపారు.
చమురు దిగుమతులపై ఆధారపడుతున్న భారత్కు రిఫైనింగ్ సామర్థ్య విస్తరణ వ్యూహాత్మకంగా కీలకంగా మారుతోంది. కొత్త ప్రాజెక్టులు, ప్రస్తుత రిఫైనరీల ఆధునీకరణ ద్వారా రాబోయే సంవత్సరాల్లో దేశ రిఫైనింగ్ సామర్థ్యాన్ని మరింత పెంచే దిశగా ప్రభుత్వం చర్యలు చేపడుతోంది.
