అలీఫ్‌ జంక్షన్‌లో జలదిగ్బంధం.. బకెట్లతో నీటి తొలగింపు!

కుత్బుల్లాపూర్‌, అక్టోబర్‌ 31 (నవజ్యోతి ప్రతినిధి): వర్షం తగ్గినా వాహనదారుల కష్టాలు మాత్రం తగ్గలేదు. ప్రగతినగర్‌లోని అలీఫ్‌ జంక్షన్‌ వద్ద శుక్రవారం రాత్రి కురిసిన వర్షానికి భారీగా నీరు నిలిచిపోయి జలదిగ్బంధం ఏర్పడింది. దీంతో వందలాది మంది వాహనదారులు, ప్రయాణికులు తీవ్ర ఇబ్బందులు ఎదుర్కొన్నారు. ఇప్పటికే కొనసాగుతున్న రోడ్డు పనులకు తోడు వర్షపు నీరు నిలిచిపోవడంతో రాకపోకలు మరింత ఇబ్బందికరంగా మారాయి.

అధికారుల స్పందన ఎక్కడ?

రాత్రి నుంచి రహదారిపై వర్షపు నీరు నిలిచినా నిజాంపేట్‌ సర్కిల్‌ అధికారులు, సంబంధిత కాంట్రాక్టర్‌ నుంచి సకాలంలో స్పందన లేకపోవడంపై ప్రయాణికులు అసహనం వ్యక్తం చేశారు. చివరకు హైడ్రా మాన్‌సూన్‌ బృందం రంగంలోకి దిగి నీటి తొలగింపు చర్యలు చేపట్టింది. ఎస్‌ఎఫ్‌ఓ శ్రీనివాస్‌, మార్షల్‌ బెనర్జీ పర్యవేక్షణలో వార్డు సూపర్‌వైజర్లు, సిబ్బంది బకెట్లతో రోడ్డుపై నిలిచిన వర్షపు నీటిని తొలగించారు.

తాత్కాలిక ఉపశమనం.. శాశ్వత పరిష్కారం ఏది?

హైడ్రా సిబ్బంది చేపట్టిన చర్యలతో తాత్కాలికంగా ఉపశమనం లభించినప్పటికీ సమస్యకు శాశ్వత పరిష్కారం అవసరమని స్థానికులు పేర్కొంటున్నారు. ఒక ప్రధాన కూడలిలో నిలిచిన వర్షపు నీటిని బకెట్లతో తొలగించాల్సిన పరిస్థితి రావడం అధికారుల ముందస్తు ఏర్పాట్లపై ప్రశ్నలు లేవనెత్తుతోంది. రోడ్డు పనులను త్వరితగతిన పూర్తి చేయడంతోపాటు వర్షపు నీరు నిలవకుండా సరైన డ్రైనేజీ, నీటి పారుదల వ్యవస్థను ఏర్పాటు చేయాలని కోరుతున్నారు.

ఇప్పటికైనా స్పందిస్తారా?

ప్రతి వర్షానికీ అలీఫ్‌ జంక్షన్‌లో ఇదే పరిస్థితి పునరావృతం కాకుండా నిజాంపేట్‌ సర్కిల్‌ అధికారులు, సంబంధిత కాంట్రాక్టర్‌ శాశ్వత పరిష్కారంపై దృష్టి సారించాలని స్థానికులు కోరుతున్నారు. హైడ్రా బృందం తాత్కాలికంగా నీటిని తొలగించినా, అసలు సమస్యకు పరిష్కారం చూపాల్సిన బాధ్యత సంబంధిత అధికారులదేనని ప్రయాణికులు అభిప్రాయపడుతున్నారు.