దుబాయ్ నుంచి టెల్అవీవ్కు వెళ్తున్న ఫ్లై దుబాయ్ విమానంలో చోటుచేసుకున్న ఘటన తీవ్ర కలకలం రేపింది. విమానంలోని కాక్పిట్లో పైలట్ల మధ్య హింసాత్మక ఘర్షణ జరిగినట్లు సమాచారం. పరిస్థితి అదుపుతప్పడంతో బోయింగ్ 737 మ్యాక్స్ విమానాన్ని సౌదీ అరేబియాలో అత్యవసరంగా ల్యాండ్ చేశారు.
ఇజ్రాయెల్ మీడియా సంస్థలు ఛానల్ 12, యెడియోత్ అహ్రోనోత్ (Ynet) కథనాల ప్రకారం.. ఈ ఘటన వెనుక ఉగ్రవాద కోణం ఉండొచ్చన్న అనుమానాలు వ్యక్తమవుతున్నాయి. అయితే ఈ విషయాన్ని ఇజ్రాయెల్, సౌదీ అరేబియా లేదా యూఏఈ అధికారులు ఇప్పటివరకు అధికారికంగా ధృవీకరించలేదు. అందువల్ల ఉగ్రదాడి యత్నమా, విమానాన్ని హైజాక్ చేసేందుకు ప్రయత్నమా అన్నది ఇంకా స్పష్టతకు రాలేదు.
విమానం తొలుత సాధారణ అత్యవసర పరిస్థితిని సూచించే 7700 స్క్వాక్ కోడ్ను ప్రసారం చేసినట్లు సమాచారం. అనంతరం విమానంపై అక్రమ జోక్యం లేదా హైజాకింగ్ను సూచించే 7500 కోడ్కు మారినట్లు ఇజ్రాయెల్ మీడియా కథనాలు పేర్కొన్నాయి. తరువాత మళ్లీ 7700 కోడ్కు మారినట్లు సమాచారం.
ఇజ్రాయెల్ అధికారిని ఉటంకిస్తూ వచ్చిన నివేదికల ప్రకారం.. విమానాన్ని కూల్చేందుకు ప్రయత్నించినట్లు అనుమానిస్తున్న పైలట్ మరో పైలట్పై దాడి చేశాడని, దీంతో విమానం ఒక్కసారిగా కిందకు దిగినట్లు పేర్కొన్నారు. ప్రయాణికులు జోక్యం చేసుకుని పరిస్థితిని అదుపులోకి తెచ్చినట్లు కూడా కథనాలు చెబుతున్నాయి.
ఈ ఘటన నేపథ్యంలో ఇజ్రాయెల్ వైమానిక దళం యుద్ధ విమానాలను రంగంలోకి దించినట్లు సమాచారం. ఇజ్రాయెల్ ప్రధాని బెంజమిన్ నెతన్యాహు, రక్షణ మంత్రి ఇజ్రాయెల్ కాట్జ్ అత్యవసరంగా పరిస్థితిపై చర్చించినట్లు ఇజ్రాయెల్ మీడియా పేర్కొంది. కొంతకాలం ఇజ్రాయెల్ గగనతలంలో ఆంక్షలు విధించినట్లు కూడా నివేదికలు వచ్చాయి.
అయితే కాక్పిట్లో అసలు ఏం జరిగిందనే దానిపై అధికారిక వివరాలు వెలువడాల్సి ఉంది. సహ పైలట్ ఒమన్ జాతీయుడని, అతడిని సౌదీ అధికారులు విచారిస్తున్నారన్న సమాచారం కూడా ధృవీకరణకు నోచుకోలేదు. ఘటనపై అధికారిక దర్యాప్తు పూర్తయ్యే వరకు దీనిని ఉగ్రదాడి లేదా హైజాకింగ్గా నిర్ధారించలేమని సంబంధిత నివేదికలు స్పష్టం చేస్తున్నాయి.
