జోధ్పూర్, సెప్టెంబర్ 26 (నవజ్యోతి ప్రతినిధి): భారత్ నిర్వహిస్తున్న ప్రతిష్టాత్మక బహుళజాతి వైమానిక విన్యాసాలు ‘తరంగ్ శక్తి-2026’ రెండో ఎడిషన్ శనివారం రాజస్థాన్లోని జోధ్పూర్ వైమానిక స్థావరంలో ప్రారంభమైంది. ఈ విన్యాసాల్లో 40కి పైగా దేశాలు పాల్గొననున్నాయి. వివిధ దేశాల యుద్ధ విమానాలు, రవాణా విమానాలు, సహాయక వ్యవస్థలు ఈ విన్యాసాల్లో భాగం కానున్నాయి.
భారత వైమానిక దళం ఇప్పటికే జోధ్పూర్కు చేరుకున్న విదేశీ బృందాలకు స్వాగతం పలికింది. యూఏఈ, ఫ్రాన్స్, ఆస్ట్రేలియా తదితర దేశాల బృందాలు విన్యాసాల్లో పాల్గొంటున్నట్లు వైమానిక దళం వెల్లడించింది. ఫ్రాన్స్కు చెందిన ఎయిర్ అండ్ స్పేస్ ఫోర్స్ శుక్రవారమే జోధ్పూర్కు చేరుకుంది.
ఫ్రెంచ్ ఎయిర్ డిఫెన్స్ అండ్ ఎయిర్ ఆపరేషన్స్ కమాండ్ డిప్యూటీ కమాండర్ జూలియన్ సబీన్ మాట్లాడుతూ.. భారత్-ఫ్రాన్స్ వ్యూహాత్మక భాగస్వామ్యంలో ఈ విన్యాసాలకు ప్రత్యేక ప్రాధాన్యం ఉందన్నారు. ‘పెగాసే-26’ మిషన్లో భాగంగా ఫ్రాన్స్ నుంచి ఏడు రఫేల్ యుద్ధ విమానాలను తీసుకొచ్చినట్లు తెలిపారు. భారత వైమానిక దళంతో కలిసి పనిచేస్తూ అనుభవాలను పంచుకోవడం తమకు ముఖ్యమని పేర్కొన్నారు.
ఈసారి తరంగ్ శక్తిలో అమెరికా రెండు నుంచి మూడు ఎఫ్-35 ఐదో తరం యుద్ధ విమానాలను మోహరించనుంది. ఫ్రాన్స్ రఫేల్ యుద్ధ విమానాలతో, యునైటెడ్ అరబ్ ఎమిరేట్స్ ఎఫ్-16 విమానాలతో పాల్గొంటాయి. ఆయా దేశాలు రవాణా విమానాలు సహా పలు సహాయక వనరులను కూడా అందించనున్నాయి.
భారత వైమానిక దళం కూడా తన కీలక యుద్ధ విమానాలను విన్యాసాల్లోకి దించనుంది. రఫేల్, సుఖోయ్-30 వంటి ప్రధాన యుద్ధ విమానాలతో పాటు గగనతల ముందస్తు హెచ్చరిక-నియంత్రణ (AEW&C) విమానాలు, రవాణా విమానాలు, గగనతలంలోనే ఇంధనం నింపే ట్యాంకర్లను కూడా ఉపయోగించనుంది.
సెప్టెంబర్ 26 నుంచి అక్టోబర్ 12 వరకు జోధ్పూర్ వైమానిక స్థావరంలో ఈ విన్యాసాలు కొనసాగనున్నాయి. వివిధ దేశాల వైమానిక దళాలు సంయుక్త వ్యూహాత్మక విన్యాసాలు నిర్వహించడంతో పాటు పరస్పర కార్యాచరణ విధానాలు, అనుభవాలను పంచుకోనున్నాయి.
ఇటీవల ఇదే జోధ్పూర్ వైమానిక స్థావరంలో భారత్-జపాన్ ద్వైపాక్షిక వైమానిక విన్యాసం ‘వీర్ గార్డియన్’ జరిగింది. దాని వెంటనే 40కి పైగా దేశాల భాగస్వామ్యంతో తరంగ్ శక్తి-2026 ప్రారంభం కావడం ప్రాధాన్యం సంతరించుకుంది.
తొలి ‘తరంగ్ శక్తి’ విన్యాసాలు 2024లో జరిగాయి. అప్పట్లో రక్షణ మంత్రి రాజ్నాథ్ సింగ్ భాగస్వామ్య దేశాలతో సహకారం, సమన్వయం, పరస్పర విశ్వాసాన్ని పెంపొందించడంలో ఈ విన్యాసాలు కీలకమని పేర్కొన్నారు. 2026 ఎడిషన్లో మరిన్ని దేశాలు, ఆధునిక వైమానిక వనరులు పాల్గొంటుండటంతో ఈ విన్యాసాల పరిధి మరింత విస్తరించింది.
