కౌలాలంపూర్, సెప్టెంబర్ 22 (నవజ్యోతి ప్రతినిధి): మలేషియాలో ఉద్యోగాల కోసం వెళ్తున్న భారతీయులకు భారత హైకమిషన్ కీలక హెచ్చరిక జారీ చేసింది. మలేషియా 30 రోజుల వీసా రహిత ప్రవేశ సదుపాయాన్ని ఉద్యోగాల కోసం ఉపయోగించుకోవద్దని సూచించింది. ఈ సదుపాయాన్ని ఉపయోగించుకుని ఉద్యోగాల కోసం మలేషియాకు వస్తున్న భారతీయుల సంఖ్యలో గణనీయమైన పెరుగుదల కనిపిస్తోందని హైకమిషన్ తెలిపింది. 2
ముఖ్యంగా కొందరు ఏజెంట్లు మలేషియాలో మంచి ఉద్యోగాలు ఇప్పిస్తామని నమ్మించి భారతీయులను తీసుకెళ్తున్నట్లు హైకమిషన్ పేర్కొంది. అక్కడికి వెళ్లిన తర్వాత ఉద్యోగం దొరకకపోవడం లేదా చట్టబద్ధమైన వర్క్ పర్మిట్ లేకుండా పని చేయాల్సిన పరిస్థితులు ఏర్పడుతున్నాయని తెలిపింది. ఇలాంటి వ్యవహారాల్లో చిక్కుకున్నవారు ఓవర్స్టే, అక్రమ వలస స్థితి, పని ప్రదేశాల్లో దోపిడీ, నిర్బంధం, చట్టపరమైన చర్యలు ఎదుర్కొనే అవకాశం ఉందని హెచ్చరించింది. 3
భారత పాస్పోర్ట్దారులకు 30 రోజుల వీసా రహిత ప్రవేశం పర్యాటకం, సామాజిక సందర్శనలు, వ్యాపారం లేదా ట్రాన్సిట్ వంటి అనుమతించిన ప్రయోజనాలకే వర్తిస్తుంది. ఉద్యోగం చేయడానికి ఈ సదుపాయం అనుమతించదు. ఉద్యోగం కోసం మలేషియాకు వెళ్లేవారు ముందుగానే చెల్లుబాటు అయ్యే వర్క్ పర్మిట్ లేదా వీసా విత్ రిఫరెన్స్ (VDR) పొందాలని భారత హైకమిషన్ స్పష్టం చేసింది. 4
మరోవైపు నిజమైన పర్యాటకులు ఇమ్మిగ్రేషన్ తనిఖీల సమయంలో అవసరమైన పత్రాలను చూపించగలిగేలా సిద్ధంగా ఉండాలని సూచించింది. కన్ఫర్మ్డ్ రిటర్న్ టికెట్, హోటల్ బుకింగ్, కనీసం ఆరు నెలల చెల్లుబాటు ఉన్న పాస్పోర్ట్ తప్పనిసరిగా ఉండేలా చూసుకోవాలని తెలిపింది. అలాగే మలేషియా డిజిటల్ అరైవల్ కార్డు (MDAC)ను ప్రయాణానికి మూడు రోజుల ముందు ఆన్లైన్లో సమర్పించాలి. 5
భారతీయులకు మలేషియా 30 రోజుల వీసా మినహాయింపు సదుపాయాన్ని 2026 డిసెంబర్ 31 వరకు పొడిగించింది. దీంతో ఈ సదుపాయాన్ని ఉపయోగించుకుని మలేషియాకు వెళ్లే వారి సంఖ్య మరింత పెరిగే అవకాశం ఉన్న నేపథ్యంలో.. ప్రయాణ ఉద్దేశం, అవసరమైన పత్రాల విషయంలో జాగ్రత్తగా ఉండాలని అధికారులు సూచిస్తున్నారు. 6
ముఖ్యంగా సోషల్ మీడియా లేదా వాట్సాప్ ద్వారా వచ్చే “మలేషియాలో ఉద్యోగం ఖాయం.. ముందుగా టూరిస్ట్గా రండి.. అక్కడికి వెళ్లిన తర్వాత వర్క్ పర్మిట్ ఇప్పిస్తాం” వంటి హామీలను నమ్మి ప్రయాణించవద్దని హెచ్చరిక వెలువడింది. ఉద్యోగం కోసం ప్రయాణించే ముందు ఉద్యోగదాత, ఉద్యోగ ఒప్పందం, వర్క్ పర్మిట్ – వీసా వివరాలను అధికారికంగా ధృవీకరించుకోవడం కీలకం.
ప్రయాణికులు గుర్తుంచుకోవాల్సినవి
30 రోజుల వీసా రహితం: ఉద్యోగం కోసం కాదు
ఉద్యోగం కోసం: చెల్లుబాటు అయ్యే వర్క్ పర్మిట్ / VDR అవసరం
పర్యాటకులకు: రిటర్న్ టికెట్, హోటల్ బుకింగ్ వెంట ఉంచుకోవాలి
పాస్పోర్ట్: కనీసం 6 నెలల చెల్లుబాటు ఉండాలి
MDAC: ప్రయాణానికి 3 రోజుల ముందు ఆన్లైన్లో సమర్పించాలి
