రూ.9 వేల కోట్ల విలువైన భూమిపై యాజమాన్య హక్కులు

విశాఖపట్నంలో 28,445 కుటుంబాలకు ఇంటి స్థలాల టైటిల్‌ డీడ్లను ఆంధ్రప్రదేశ్‌ ముఖ్యమంత్రి ఎన్. చంద్రబాబు నాయుడు శనివారం పంపిణీ చేశారు. దీంతో సుమారు రూ.9 వేల కోట్ల విలువైన భూమిపై లబ్ధిదారులకు పూర్తి యాజమాన్య హక్కులు కల్పించినట్లు ప్రభుత్వం తెలిపింది.

మొత్తం 399 ఎకరాల భూమిని క్రమబద్ధీకరించి, 19.3 లక్షల చదరపు గజాలకు పైగా విస్తీర్ణాన్ని ఈ ప్రక్రియలోకి తీసుకొచ్చారు. దీంతో ఇళ్లను నిర్మించుకుని దశాబ్దాలుగా యాజమాన్య హక్కుల కోసం ఎదురుచూస్తున్న కుటుంబాలకు పట్టాలు లభించాయి. ముఖ్యమంత్రి స్వయంగా పలువురు లబ్ధిదారులకు పట్టాలను అందజేశారు.

పట్టాలు పొందిన కుటుంబాలకు ఇళ్లపై పూర్తి హక్కులు లభిస్తాయని చంద్రబాబు తెలిపారు. ఈ హక్కులతో ఆస్తులను భవిష్యత్తులో పిల్లలకు వారసత్వంగా ఇవ్వడంతో పాటు, ఆస్తి బదలాయింపు – ఆర్థిక అవసరాలకు వినియోగించుకునే అవకాశం ఉంటుందని అధికారులు పేర్కొన్నారు.

అభ్యంతరాలు లేని చోట ప్రభుత్వ భూముల్లో నిర్మించిన ఇళ్లను క్రమబద్ధీకరించి, అక్కడ నివసిస్తున్న వారికి యాజమాన్య హక్కులు కల్పించాలని ముఖ్యమంత్రి అధికారులను ఆదేశించారు. గాజువాక నుంచి భీమిలి వరకు విశాఖ నగరంలోని పలు ప్రాంతాల్లో ఈ భూ క్రమబద్ధీకరణ ప్రక్రియ కొనసాగనుంది.

‘మీ భూమి – మీ హక్కు’ కార్యక్రమం ద్వారా రెవెన్యూ శాఖకు సంబంధించిన సమస్యలను పరిష్కరిస్తున్నామని చంద్రబాబు తెలిపారు. గతంలో 12 వేల కుటుంబాలకు భూములను క్రమబద్ధీకరించిన అనంతరం పట్టాలు ఇచ్చినట్లు ఆయన పేర్కొన్నారు.

విశాఖపట్నంలో తాగునీటి సమస్యపైనా చంద్రబాబు మాట్లాడారు. వర్షాభావ పరిస్థితుల కారణంగా నీటి సమస్య తలెత్తుతోందని, పోలవరం ప్రాజెక్టు – నదుల అనుసంధానం ద్వారా విశాఖతో పాటు రాష్ట్రంలో నీటి కొరతకు శాశ్వత పరిష్కారం చూపే దిశగా చర్యలు చేపడుతున్నామని తెలిపారు.

పోలవరం ఎడమ ప్రధాన కాలువ ద్వారా గోదావరి జలాలను అనకాపల్లికి తీసుకువచ్చామని, భవిష్యత్తులో వంశధార నదిని కూడా అనుసంధానించే దిశగా ప్రణాళికలు ఉన్నాయని చంద్రబాబు వెల్లడించారు. విశాఖను అభివృద్ధి చేస్తూనే ప్రజలకు అవసరమైన మౌలిక సదుపాయాలను కల్పిస్తామని ఆయన పేర్కొన్నారు.